Muguruza a chak lo

Wimbledon champion lai Garbine Muguruza chuan a title humhim tumin inbuatsaihna a nei chho mek a, mahse a beisei ang result a hmu lo. Spanish nula hi Nature Valley Classic-ah inlanin Barbora Strycova lakah 6-2, 6-4 in a tlawm.

Seeded pakhatna Muguaruza hi champion tura rinkai a ni a, mahse inkhel bul a ṭan fuh tawk loh avangin set hmasa a hloh nghal. Set hnihnaah 4-2 in hma hruai thei bawk mah se game hnuhnung pali a hloh vek avangin a zinkawng a tawp.

World number 3 Muguruza hian tihsual a ngah a, world number 24 Strycova hmaah unforced errors vawi 29 ngawt a nei. Grass court inelna liana hlawhtling nawn tur chuan a insiamṭhat ran a ngai dawn hle.

Kum 24 mi Muguruza chuan, "Barbora khan a khel ṭha em em a, a khelh dan hmang leh grass court kha a inmil hle a ni. Season hmasa angin ka la khel ṭha tawk lo a, inbuatsaihna hun tlem kan la neih hi a ṭha thei ang bera hman ka tum ang," tiin a sawi.

Inkhel dangah champion lai Petra Kvitova chuan Daria Gavrilova chu 6-2, 6-2 a hnehin quarterfinal a lut a, semifinal thleng tur chuan Ashleigh Barty hnehtu Julia Gorges a paltlang leh a ngai dawn a ni.