Djokovic-a'n match 800 a hnaih

Novak Djokovic chuan Queen's Club-ah quarterfinal a lut a, Serbian tlangval hian tennis a khelh hun chhungin match 799 zet hnehna a chang tling ta a, mellung pawimawh phun turin vawi khat chak bak a mamawh tawh lo.

Ningani zan inkhelah world number 1 hlui Djokovic hian world number 5 Grigor Dimitrov chu 6-4, 6-1 in a hneh. Wimbledon inbuatsaihna lama hnehna chang turin Djokovic hian darkar khat leh minute nga bak a mamawh lo, a match lehpekah chuan Julien Benneteau hnehtu Adrian Mannarino nen an intawng leh ang.

Grand Slam vawi 12 champion tawh Djokovic chuan, "Match 800 a tlin theih ngei ka beisei," a ti. Hnehna a chang a nih chuan Open Era chinah hetiang dinhmun thleng thei player 10-na chiah a ni dawn a ni.

Hliam vanga a buai hnuah Djokovic hian beisei a la phak leh lo a, tun dinhmunah world ranking lamah pawh 22-na niin, kum khat hnuah ranking-a a sang 10 zinga mi lakah hnehna a chang ve leh chiah–a tan Wimbledon beiseina a san phah ang.

Inkhel dangah Andy Murray hnehtu Nick Kyrgios chu Britain tlangval dang lakah a hran chhunzawm zel. Australian star hian khawtual tlangval Kyle Edmund lakah vawi 32 ngawt aces vaw chhuakin 7-6 (7/3), 6-7 (5/7), 6-3 in hnehna a chang leh a ni.

World number 21 Kyrgios hi vawi hnih a khelh tawhna thlir chuan champion thei tur zinga mi a ni a, chutihrualin a match lehpeka a tum tur Feliciano Lopez hi nomawi kawl lai a nih avangin a hmabak a awlsam lo chho hle.