Leipzig pan tur Nagelsmann

Hoffenheim manager Julian Nagelsmann chuan season thar hman zawh rualin a hna a kalsan dawn a, Bundesliga lama an elpui RB Leipzig a enkawl tawh zawk dawn a ni.

Kum 30 mi Nagelsmann hian 2016 February thla aṭang khan Hoffenheim a enkawl ṭan a, beisei aiin hna a thawk ṭha. Bundesliga manager naupang ber hian a season khatnaah a club hi tla thei dinhmun aṭangin a chhanhim a, season liam ta khan league-ah pathumna nihpuiin a vawi khat nan Champions League a khelhpui dawn.

Hoffenheim tan hian June 2021 thleng daih contract a nei mek, mahse an inrem danah a duh chuan a chhuah theih tur thu a tel a, Leipzig tan 2023 thleng daih contract a ziak ta zawk a ni.

Leipzig lam hian season hmasa khan beisei an phak lo thung, league-ah parukna niin coach Ralph Hasenhuttl chuan May thla khan a hna a bansan, tun season chhung chu manager lailawk kaihhruaina hnuaiah an khelh a ngai dawn. Hoffenheim pawhin thlasik a nih hunah season thara an manager tur an puan tur thu an sawi ve thung.