Sevilla tan Champions League beiseina

Ramon Sanchez-Pizjuan Stadium-ah fan-te kir thei rih lo mah se Champions League erawh kir leh tir ngei an tum tih an pholang a, Sevilla chuan European football-a an beiseina chhi nung turin Real Betis chu 2-0 in an hneh - table-ah pathumna an nih chhunzawm zel.

Covid-19 vanga league tawp lailawk a nih hnua match hmasa berah goal hmu turin second half thleng nghah a ngai a, first half-a crossbar tih pertu Lucas Ocampos chuan minute 56-naah penalty aṭangin goal hmahruai hi a khung. 

Kum 25 mi Ocampos hian La Liga match nga chhung chu a zawnin goal a khung ta a, September 2011-a Alvaro Negredo hnua Sevilla tana La Liga match nga a zawna goal khung thei hmasa ber a ni. 

Argentina tan vawi thum inlana goal hnih khung thei Ocampos hian Sevilla tan tun season-ah inelna hrang hranga match 30 khelin goal 13 a khung tawh a, a 'hot' chho hle. 

Minute 62-naah Ocampos hian Fernando goal khung tur a siamsak leh a,  2-0 a hnehna changin European football inelna sang bera inlan an beisei zel. 

Ningani zan inkhelah hian stadium-ah entu awm rem lo mah se fans tam tak insum zo loin khelmual hi an pan tho a, a chhungah lut thei lo mah se pawn lam aṭangin an team an ṭawiawm. 

La Liga hian television lama entute tana en nuam turin fans au thawm chu an dah sa a, stadium chu ruak lutuka a lan loh nan fans lem siamin an dah bawk - mahse La Liga lam hian fans thawm leh a lem dah velah hian beisei an phak lo. Fans thawm a zawi lutuk chang a awm a, camera-in a hawi zawng a thlak changin fans 'lem' hi an bo ṭhin bawk.