Zaninah Carrick enkawl Man United Vs Villarreal
Manchester United-in result ṭha an neih theih loh avangin manager Ole Gunnar Solskjaer an ban a, zanin dar 11:15 hian manager lailawk Michael Carrick-a hoin Spanish club Villarreal an hmachhawn dawn.
Champions League-ah Man United hi group F hmahruaitu ni mah se zanina an khingpui tur Yellow Submarine nen point sarih ve ve an hmu a, pathumna Atalanta-in point nga an hmuh tawh bawk avangin knockout stage lut tur hriatthiam a la har hle.
Poch an beisei
Manchester United-in Ole Gunnar Solskjaer hnuaiah khelh dan nghet an nei thei lo a, dawh thei takin nghak mah se result ṭha an neih theih loh avangin Norwegian manager an ban.
English club hian manager lailawk atan Michael Carrick an ruat a, manager nghet an zawng pah reng. Real Madrid hlawhtlin puitu Zinedine Zidane-a'n club enkawl nei lo mah se Man United enkawl châkna a nei lo.
French manager hian PSG hna a ruak a nih chuan enkawl a duh niin a sawi a, amaherawhchu French club hi Mauricio Pochettino-a'n a enkawl mek.
Poch hi Man United nen sawizawm a ni tawh ṭhin a, season laklawh laia lakchhuah hi thil harsa tura ngaih ni mah se Argentine manager ber hian Old Trafford-a kal a duh niin a sawi awm.
Tottenham manager hlui hian Lionel Messi, Kylian Mbappe leh Neymar te kawl mah se mamawh aia tam player a nei a, nipui bazara Italy goalkeeper Gianluigi Donnarumma an lakluh te chuan hna a tih harsat belh. PSG squad hi an balance ṭha lo a, Poch hian pressure a ngah bawk - Old Trafford pan tura sawi hi thil mak a ni lo.
Chutihrualin season thar an nghak a nih chuan Ajax manager Erik Ten Hag a beisei theih ang a, Leicester manager Brendan Rodgers pawh lakchhuah theih mai tura ngaih a ni bawk. A ṭha nghah nan Carrick an ring phawt a, a fuh tawk lo a nih pawhin Man United defender hlui Laurent Blanc leh Steve Bruce te chu lak theih tura ngaih an ni bawk.
Inkhel pawimawh
Manchester United-in manager nghet tur zawng mek mah se inkhel pawimawh an hmachhawn pah reng a ngai. Zanina Villarreal nena an inkhel tur pawh hi a pawimawh a, El Madrigal-a an khelh dawn avangin a harsa sawt ang.
Inhliam vangin Raphael Varane, Paul Pogba, Mason Greenwood leh Edinson Cavani te an tel thei dawn lo a, Luke Shaw dinhmun a chiang lo bawk. Manager lailawk Carrick tan hmabak a harsa dawn a, chutihrualin Watford laka Jadon Sancho leh Donny van de Beek te khelh dan thlir chuan starting eleven ṭha an awm thei turah a la ngaih theih tho.
Villarreal lamah Gerard Moreno a la khel thei dawn lo a; Arnaut Danjuma, Etienne Capoue leh Paco Alcacer te dinhmun a chiang lo. Chutihrualin Yellow Submarine coach Unai Emery hi tawnhriat nei ṭha a ni a, pressure sangah Carrick aiin a thluak a fim zawk tura ngaih a ni.