Cricket thiam ber Ramhlun Venglai

Cricket Association of Mizoram (CAM) hnuaia inelna President's Cup 20201 khelh zawh takah Ramhlun Venglai an champion. RVL hian nimin khan Chhinga Veng chu 31 runs a hnehin tualchhung cricket inelna huangah nomawi an chawi leh ta a ni.

Suaka Cricket Ground, Sihhmuia inkhelah ṭhum vawra vannei zawk Chhinga Veng lamin vawm hmasak an thlang a, duh an thlang sual niin a lang. Ramhlun Venglai tan Reuben Lalhruaizela'n ball 36 a hmachhawn aṭangin 50 runs a siam.

Reuben bakah Lalhmachhuana (43 runs) leh Vanmalsawma (20) ten an thlawp ṭha bawk, over 20 chhunga run 138 siamin target sang tawk tak an siam a, inelna neih laiah match khata run an siam hnem ber ṭum a ni.

Chhinga Veng lam khel ṭha ni se target hi umphak theih a ni. Mahse, tawnhriat ngah Vanlalruata Khawlhring chuan 17 runs bak a siam thei lo a, Jonathan Lalrinchhana'n 35 runs siamin 3C beiseina siamsak mah se thlawptu an hmu ṭha tawk lo.

RVL manager Vanlalzuata chuan, "Kan fixture a fuh a, champion kalkawngah kan vannei hle. Kan nauten an khel ṭha em em vek a, club player zinga mi pariat ngawt Mizoram tan an feh chhuak chunga kan champion thei hi a lawmawm zual," tiin Vanglaini a hrilh.

Ramhlun Venglai hi CYMA Cricket champion lai an ni bawk a, tualchhung cricket inelna hrang hrangah chuan record nei ṭha berte zinga mi niin, Mizoram aiawh tur pawh a chher chhuak hnem zinga mi an ni bawk.

Final Thlirna Tawi
Ramhlun Venglai (138/9) bt Chhinga Veng (107/10)
Ramhlun Venglai hi run 31-in an chak
Toss: Chhinga Veng lamin vuak hmasak an thlang
PoM: Reuben Lalhruaizela, Ramhlun Venglai

Mimal Lawmman
Most Valuable Player Reuben Lalhruaizela, Ramhlun Venglai
Final MVP Reuben Lalhruaizela, Ramhlun Venglai
Best Bowler Lalrinfela Zadeng, Ramhlun Venglai
Best Batsman Rahul Sunar, Gorkha