MBBA-in Lalrina an hmuak

Mizoram Basketball Association chuan 6th SABA Championship-a India champion puitu Lalrina Renthlei chu nimin khan Lengpuiah an hmuak.

MBBA president Dr Lalrinawma Hnamte chuan, "BFI Meeting-ah Mizoramin player an neih thu an hria a, a nawm phah hle. India mipui tluklehdingawn khat chuang zinga mi 12 thlan zinga Mizo an tel hi a ropui. Mapuia hnuah kum 16 kan nghak a, mi tumruh Lalrina kan nghak chhuak. Basketball tana theihtawp chhuahtu Lalrina ka fak a, a chhungte nen an hlawhtlinnaah ka lawmpui," tiin a sawi.

Tuikhuahtlang tlangval Lalrina hi H. Laldinsanga dawta Mizo zinga India basketball team-a tel leh thei hmasa ber a ni a, Mizo zinga India team champion pui hmasa ber a ni thung.

Dhaka-a neih SABA Championship-ah India hian an khingpui Maldives (88-31), Sri Lanka (114-48) leh Bangladesh (106-41) te chu champion turin an sawp vek.

Mizo tlangval Lalrina hian MSL hnuhnung paliah nomawi a chawi vek a, Zarkawt BCA ṭum thum a champion pui ṭumah MVP-ah thlan a ni vek.

Lalrina hian basketball-a record ṭha tak a neih bakah Mizoram snooker a thunun a, India aiawhin ṭum nga a feh chhuak tawh. Mizo infiammi zinga infiammi chi hniha India aiawh hmasa ber a ni a, MBBA-in chawimawi hun an hman bakah hian an veng Tuikhuahtlangin an chawimawi bawk.