Conte hoin Spurs an chak

Harsa rih viau mah se Antonio Conte chuan result ṭha a nei tlat zel. Italian manager Conte hian Tottenham a enkawl hnua a vawi khat nan Premier League-ah hnehna an chang, an mikhual Leeds United chu 2-1 in an hneh.

Mualneitu Tottenham lamin inkhel thunun mah se hun chanve hma lamah goal an khung thei lo, fans lamin striker Harry Kane leh a ṭhiante hi goal khung turin an duh takzet tih an thawm aṭangin a hriat theih a ni.

Chawlhlawk hma chiahin Leeds lamin Jack Harrison siamsak chu Daniel James-a'n a khung a, a tir lamah Kalvin Phillips-a freekick ṭha tak chu keeper Hugo Lloris chuan a lo dan bakah, Adam Forshaw-a'n hun ṭha a hlah bawk.

Mikhual lamin chawl-hlawk laiin 1-0 in hma an hruai a, fans ṭhenkhat chuan Spurs player an au el hman hial. Conte-a'n chawlhlawk an hma laiin a naute a fuih ṭha, inkhel chawhnu lamah North London inkhel a kang sawt.

Lucas Moura thawhrah sengtu Pierre-Emile Hojbjerg-a'n si phurh a sut a, defender Eric Dier-a freekick an dan perin goal ban a per a, ball per hi Sergio Reguilon chuan Spurs tana a goal hmasa ber khung nan a hmang a, chakna goal a ni nghal bawk.

Conte-a naute hi Premier League table-ah pasarihnaah an inhlangkai a, a sang zual pali zinga mi West Ham an phak lohna chu point li a ni - season tir lam chauh a la nih avangin nakkum atan Champions League khelh an la beisei ngam dawn.

Italian manager Conte chuan, "Theihtawp chhuah ka duh, table lama kan dinhmun tih san hi kan thil tum chu a ni. A sang zual pali zinga tel phak ngei kan tum a, team dang pawhin an tum. Chumi tur chuan sum pawh an sang nasa hlawm hle.

"A nihna tak sawi chuan team dang nen kan inthlauhna hi a zau angreng, a zim thei ang bera siam kan tum ang. Ka naute chungah rinna ka nghat ngam a, kan elpuite chesual zeuh an awm a nih chuan an hmunruak hnawh khah nghal kan tum ang," tiin a sawi.

Chak lo Leeds United erawhin hma an la sawn hleithei lo. Match 12 aṭanga point 11 chauh an la neih avangin 17-na an ni a, relegation zone aṭanga an himna chu point hnih chauh a nih avangin Marcelo Bielsa naute tan insiamṭhat a ngai tawh hle.