Hamilton leh Mercedes an la beidawng lo
Lewis Hamilton-a'n Formula 1 nomawi a kawl lai hloh mai a tum lo. Mercedes driver hian Qatar Grand Prix-ah hnehna a chang a, championship table hmahruaitu Max Verstappen nen an inkar a sawr zim zel.
Tun season chhungin Saudi Arabia leh Abu Dhabi Grand Prix te chauh tlan tur a awm tawh, champion lai Hamilton-a'n a chunga awm Max a phak lohna chu point riat a la ni a, a tawp thlengin inelna a hmuhnawm dawn.
Qatar GP-ah Hamilton leh Verstappen te a indawtin an thleng, pathumna chu Fernando Alonso a ni. 2014 Hungarian Grand Prix hnua a vawi khat nan Alonso hian podium a rap ve leh chiah a ni.
Lewis tan hnehna
Brazilian GP an tlan dawn khan Verstappen chu chak tura rinkai a ni a, chak ni se la chuan champion zui thei mai tur a ni. Mahse, Hamilton-a'n kum danga a chet ṭhat tawk ṭhin lohna hmunah hnehna a chang, tunah chuan Qatar GP hmasa berah result duhawm a nei chhunzawm.
Qualifying lama a chet ṭhat avangin a hmasa ber aṭangin an tlan ṭan, harsatna lian tham em em tawk loin intlansiak a thunun tluan thei. Verstappen erawh pahnihna aṭanga tlan ṭan tur ni mah se hrem a nih avangin pangana aṭangin a tlan ṭan.
Red Bull driver hian lap khat chhunga tlan chak ber record te a siam hial a, hnehna chang zo ta chiah lo mah se pahnihna a nih phak avangin a hmahruaina a la hum zel a, season tawp thlenga hum tluan erawh a awlsam dawn lo.
Beisei a la awm
Intlansiak pakhatah point 25 zet a hmuh theih a, inelna hmabak pahnih chauh awm tawh mah se Hamilton tan nomawi hum beiseina a la sang hle. Chutihrualin a chetsual a thiang tawh lo a, a elpui Max chet fuh loh a chan tel a ngai tawh bawk.
Britain tlangval Hamilton chuan, "Season harsa tak kan hmang a, tunah chuan a zawnin hnehna kan chang ve ta. Hetiang result hi kan mamawh chu a ni a, inelna dang hmachhawn leh pawh a chakzawm ta zak mai," tiin a phur thu a sawi.
Car intlansiakna sang berah Hamilton hian vawi 102 zet hnehna a chang tawh, kuminah hian a champion leh thei a nih chuan Michael Schumacher nena an record inṭawm (7 titles) lai a kalsan thei dawn a, champion hnem ber a ni ang.