Man City an chak nuam sa

Manchester City chuan Pathianni zan khan harsatna nei loin Everton 3-0 in an hneh. Pep Guardiola hote tan hian Raheem Sterling, Rodri leh Bernardo Silva ten goal an khung a, inkhel thunun chungin hnehna an chang.

Etihad Stadium-ah mualneitu an hmuhnawm a, Everton-in goal venhim hna thawk mah se minute 44-naah Joao Cancelo pass mawi zet chu Sterling-a'n goal-ah a chantir. English forward hian top flight-a match 300 a khelhna chiah a ni.

Goal khat an neih hnuah Man City-in nuam sa takin an khel thei a, Rodri-a'n kawh zetin minute 55-naah a khung belh a, hun tawp hma minute li la awmin Bernardo Silva-a'n a khung belh.

Everton-in hliam an ngah a, Dominic Calvert-Lewin awm lohna tlarhma a bil a, Yerry Mina awm lohna tlarhnung pawh a phui chuang lo. Jordan Pickford-a'n Silva leh Sterling goal khung tur a dan zarah goal tam zawk an chhuah lo.

Man City-in point 26 hmuin pahnihna dinhmun an luah a, hmahruaitu Chelsea point thum chauh an pha lo. Chutihrualin Pep-a hote hi an huaia awm Liverpool aiin point khat chauhin an hmu tam. Premier League champion hian November 24, Ningani zanah Lionel Messi telna PSG an mikhual dawn a, Champions League inkhel hi football ngainatute en châk a ni ang.