Nagaland hnehtu Mizoram

Mizoram Under 25 cricket team chuan Board of Control for Cricket in India (BCCI) hnuaia inelna neih lai, Mens Under 25 State A Trophy-ah Pathianni khan Nagaland chu wicket sarih in an hneh.

Amingaon, Assam-a inkhelah Nagaland in vuak hmasak an thlang a, Numalijalah Parade Ground-ah Mizoram bowler-ten an khingpuite vawm out zo turin over 43 chiah an mamawh a, run 147 an siamtir.

Tualchhung bowler Sahil Reza leh Lalhriatrenga ten wicket thum ve ve an la a, captain F. Lalruatfela chuan wicket hnih la in Vanlalremruata leh F. Vanlalmuanzuala ten wicket khat ve ve an la bawk.

Mizoramin chak turin run 148 siam an mamawh a, over 34.1-ah wicket thum chiah hlohin an tum ram an thleng. Opener Gaurav Singh che ṭha in run 80 a siam a, a tawp thlengin an vawm out thei lo.

Ningania Arunachal Pradesh laka hnehna chang tawh Mizoram hian khelh li aṭang vawi hnih hnehna an channa a ni a, Plate Group-ah point 8 hmu in pangana an ni mek. Inrinni khan team ṭha Assam nen Nehru Stadium-ah inkhel tawhin hemi ṭum erawhin an tlawm.

Mizoram team manager Laithanzuala chuan, "Amingaon-a pitch hi bowler-te chetṭhatna tura ngaih a ni a, kan spinner ten an hmang thiam a, pace bowler-te pawhin an chhawr. 80 runs siamtu Gaurav hi che ṭha turin a thawkrim a, a dingngheh tawh chuan hetianga che tura talent nei ṭha a ni," tiin an chak hnuah a sawi. Mizoram hian Nilainiah Manipur nen match an khel leh ang.