ATP Finals champion Zverev

Alexander Zverev chuan Daniil Medvedev hnehin ATP Finals title a la. Ranking sang zual pariat inelnaah Zverev hi a vawi hnih champion-na a ni a, tunah chuan Grand Slam nomawi chauh a hmabak ta.

Pathianni zana final inkhelah kum 24 mi Zverev-a'n a tir aṭangin inkhel a thunun, harsatna lian tham tawk lohin champion lai hi 6-4, 6-4 in a hneh - 2018 champion hian a khingpui hi break point pawh a hmuhtir miah lo.

World number 3 Zverev chuan, "Tennis ka khelh ve tawh china ka match ṭha ber a ni hial mai thei, hetiang baka ṭha a season khar dan hi ka tan chuan a awm thei tawh chuang lo," a ti. Tun season chhungin nomawi paruk a chawi, heng zingah hian Olympic gold medal pawh a tel.

Final kalkawngah Zverev hian world number 1 Novak Djokovic pawh a hneh thei a, tun hnaia a hneh hleih theih loh Medvedev hnehin nomawi a chawi thei ta, tunah chuan season thar atan a beiseina pawh a sang khawp ang.

Zverev chuan, "A zawnin vawi nga ka hneh lo, tun ṭumah hnehna min chantir avangin ka lawm e," tiin Medvedev hnenah lawmthu a sawi, chak lo Medvedev pawhin a ṭhianpa chuan engtik niah emaw chun major title a lak ngei a rin thu a sawi ve bawk.

Kum 2018 khan Zverev hian ATP Finals nomawi hi a lo chawi tawh a, hemi ṭum hian Djokovic a hneh. Player beisei awm tak ni mah se Grand Slam nomawi chawi erawh a harsat, nikum khan US Open final lut mah se set hnih a lak hnuah a chak lo.

January thla aṭangin Australian Open an khel leh ṭan dawn, hard court hi Zverev tan inkhelh nawmna hmun pakhat a ni a, a chesual viau a nih ngawt loh chuan champion tura rinkai berte zinga mi a ni ang.

Kumin ATP Finals-ah hian hliam vangin Roger Federer leh Rafael Nadal te an inlan lo, player ropui pahnih hi an vanglai a liam mek tawh avangin rawlthar thaza rualten an hmun ruak an rawn luah mek, season tharah inelna hmuhnawm zawk a awm thei dawn.