Benfica hmaah Xavi ‘Barca’ fiahna

Barcelona-in zanin dar 1:30 hian Nou Camp-ah Benfica an mikhual dawn a, Xavi kaihhruai Catalan club tan Champions League group stage paltlang turin point hmuh ngei ngei a ṭul dawn. Group E inkhel dangah last 16 lut tawh Bayern Munich-in zanin dar 11:30 hian Dynamo Kiev an tlawh bawk ang.

3-0 a pawi
UEFA hnuai inelnaah head to head en hmasak a ni a, Benfica hian an mualah Barcelona hi 3-0 in an sawp tawh. Catalan club hian Portuguese club lakah point khat chauh an hmu a nih chuan, last 16 lut turin match hnuhnung bera Bayern Munich an hmachhawn hunah point khat tal hmuh leh a ngai dawn.

Hemi a nih avang hian Barca tan last 16 lut turin Xavi hnuaia Champions League an khelh hmasak berah chak a pawimawh. Nou Camp-a Benfica an hneh a nih chuan group stage an paltlang dawn.

Xavi ‘Barca’
Barcelona-in Xavi hnuaia an match hmasa berah Espanyol 1-0 in an hneh a, goal awmchhun hi Memphis Depay-a'n penalty aṭangin a khung.

Xavi-a'n khelh dan phunga a naute khelhtir turin hun a ngah tawk lo a, harsatna belhchhah turin player ṭhahnem tak an inhliam. Ansu Fati, Martin Braithwaite, Pedri leh Sergio Aguero te hliam vangin an la inkhel thei lo a, Sergino Dest erawh training a zawm tawh avangin inlan thei dinhmunah a ding.

Ronaldo Koeman thlaktu Xavi chuan, "Tunlaiah chuan inkhel awlsam a awm tawh lo. Chutihrualin hmasawnna tur tam tak kan nei. Fan-ten team an ṭawiawm ṭhat avangin team pawh a phur phah a, player-te an tlan taima a, theithawp an chhuah avangin hmasawnna a awm ang," tiin hma an sawn zel tur thu a sawi.

Barcelona player zingah hliam an tam avangin Xavi hian medical team pawh a thlak vek a, chutihrualin hun a ngah lo. Catalan club tan Champions League group stage paltlang loh hi mualphona a ni a, Benfica nena an inkhel tur hi final ang hiala sawi theih a ni.

Hei le, Benfica
Benfica hian Barca aiin Champions League-ah bul ṭan ṭha zawk mah se team ṭha ber Bayern Munich an hmachhawn zawn a, an hneh loh ve ve avangin Catalan club hnuaiah an awm ta zawk.

Portuguese club hian an muala Barca an sawp ṭumin Darwin Nunez-a'n goal hnih a khung a, Rafa Silva-a'n goal hnih a khung bawk. Benfica hian German champion an hneh loh ṭum hian game hmuhnawm an khel tho a, team ṭha an ni tih zep rual a ni lo.

Jorge Jesus hote hian Bayern an hneh loh hnuah league match vawi hnih khel tawhin Sporting Braga 6-1 in an sawp a, match hnuhnung berah Pacos Ferreira 4-1 in an sawp leh bawk.

Benfica manager Jorge Jesus chuan, "Kan theihna kan hriat avangin Barcelona kan la elpui thei a ni," tiin Catalan club an chhaih buai theih thu a sawi a, Portuguese club hian Rafa leh Darwin Nunez bakah Roman Yaremchuk, Everton, Joao Mario leh Julian Weigl te an kawl avangin an tawh a khirh viau ang.