La Liga hmahruaitu Real Madrid

Real Madrid-in Pathianni zan khan Granada 4-1 in an hneh a, La Liga hmahruaitu an ni. Carlo Ancelotti hote tan hian Marco Asensio, Nacho, Vinicius Junior leh Ferland Mendy ten goal khat ṭheuh an khung a, 2-0 a nih laiin Granada tan Luis Suarez-a'n goal khat a khung ve bawk.

Los Blancos hi Champions League-ah pawh group hmahruaitu a ni mek a, November 24, Nilaini zan hian Sheriff an hmachhawn dawn. Real Madrid hian Moldovan club hi an hneh a nih chuan match khat khelh hmabak nei chungin last 16 an lut ang.

Los Carmenes-ah Real Madrid tan Marco Asensio-a'n minute 19-naah goal hmahruai a khung a, Spanish midfielder hian Toni Kross through ball chu um lutin ṭha taka a lakluh hnuah box chhungah rilru fim la neiin goal hmahruai a khung.

Minute 25-naah goal hnihna a lut a, Kroos-a cross Nacho-a'n box chhung aṭangin a khung. Los Blancos an khel ṭha chhunzawm a, Asensio-a'n minute 30-naah goal hnihna a khung leh teuh hle.

Granada beiseina siam turin Luis Suarez-a'n siphurh a sut a, box pawn aṭanga a ball pet chu Real Madrid defender-in a dan per avangin keeper Thibaut Courtois tan daih ngaihna a awm lo.

Karim Benzema goal hmaah a vannei tawk lo a, Real Madrid goal bawh erawh a na chhunzawm. Minute 56-naah Luka Modric-a'n mahni hma sial lo takin Vinicius Junior tan a pe a, Brazilian winger hian goal ruakah a khung.

Vini Junior a hmuhnawm zui a, Brazilian rawlthar vang hian minute 67-naah Monchu an hnawhchhuah phah. Real Madrid-in an tamna an hmang ṭangkai a, Ferland Mendy-a'n minute 76-naah chak nemnghehna goal a khung.