LeBron James an hnawtchhuak

Nimin zing NBA regular season inkhelah LeBron James an hnawtchhuak a, James awmna Los Angeles Lakers hi point 17 zetin hniam zawk hman mah se Detroit Pistons chu 121-116 in an hneh let ta tho.

Ball rebound an inchuhna lamah James hian Pistons centre Isaiah Stewart a chuh na deuh a, player pahnih hi dan kalha an chet ve ve avangin hnawhchhuah (eject) an ni zui.

Lakers hian kuminah vawi kua hnehna an chang tling ve ta chiah a, an chak zat chiah hi an tlawm tawh bawk. Nilaini zingah New York Knicks nen an inhmachhawn chhunzawm leh nghal ang.

Nimin zing inkhel dangah Los Angeles Clippers chuan Dallas Mavericks 97-91 in an hneh, a zawna an vawi 12 chakna ni turin Phoenix Suns pawhin Denver Nuggets chu 126-97 in an hneh ve bawk.

Chicago Bulls pawhin an dinhmun an sawhnghet zel. Bulls hian New York Knicks 109-103 in an hneh a, an match hnuhnung panga aṭangin vawi li hnehna an chang. Golden State Warriors pawhin 119-104 in Toronto Raptors an hneh.