East Bengal leh Jamshedpur an inhnehtawk

East Bengal-in manager thar Manolo Diaz hnuaia an match hmasa berah Jamshedpur nen 1-1 in an inhnehtawk. Pathianni zan inkhelah hian Kolkata club tan Franjo Prce-a'n goal khung hmasa mah se Jamsphedpur-in Peter Hartley hmangin first half-ah vek an sut.

Tilak Maidan-ah East Bengal tan Mizo rawlthar duhawm Lalrinliana Hnamte-in bul a ṭan a, Jamshedpur tan wing back pahnih Ricky Lallawmawma leh Laldinliana Renthlei ten bul an ṭan bakah MPL best defender ni tawh PC Laldinpuia chu bench-ah a ṭhu bawk.

Kolkata club tan Rintea'n chance ṭha a nei hmasa ber a, box pawn aṭanga a ball pet chu keeper zawnah a pet. East Bengal-in an nawr nat rah an seng a, Jamshedpur-in box chhunga ball awm an clear theih loh avangin Croatian defender Franjo Prce-a'n minute 19-naah goal hmahruai a khung.

East Bengal an chungnung zawk a, amaherawhchu goal an khung theih loh an tuar. First half injury time-ah Jamshedpur defender Peter Hartley-a'n corner aṭanga ball kal chu a su lut.

Second half-ah chance ṭha bik tiha sawi tur a awm lo a, chutihrualin injury time-a East Bengal midfielder Jackichand Singh-a'n keeper chhuak a hmuh avanga a goal-a a pet nghal erawh crossbar chungah a kal.

Zanin dar 7:30 hian Lallianzuala Chhangte leh Jerry Lalrinzuala telna Chennaiyin FC-in Hyderabad an hmachhawn dawn. Lianzuala hian season ṭha zawk hmang tura a inpeih thu a sawi a, record ṭha tak nei turin season bul aṭanga chet ṭhat a pawimawh ang.

November 21, Pathianni
East Bengal 1 - 1 Jamshedpur
EBE : Franjo Prce 19'
JAM : Peter Hartley 45+6'

Zanin Inkhel Tur
Hyderabad 07:30 PM Chennaiyin