Rohit Sharma hnuaiah India an chak

India-in Rohit Sharma captain-na hnuaiah New Zealand chu T20 series match thum khelhah 3-0 in hnehna an chang. Men in Blue hian Pathianni zan khan Black Caps hi 73 runs-in an hneh a, match thum an khelhah an chak vek.

Eden Gardens-ah India-in bat hmasak an thlang a, captain Rohit Sharma chuan ball 31 lekah 56 runs a siam bakah Ishan Kishan-a'n 29 runs a siam ve bawk.

Shreyas Iyer (25) leh Venkatesh Iyer (20) bakah Harshal Patel (18) leh Deepak Chahar (21*) te rawn che ṭha bawkin India-in 184/7 runs an siam.

New Zealand tan target an sang mah mah a, Martin Guptill-a'n 51 runs siam mah se over 17.2-ah 111 runs siamin an thi vek. Axar Patel chuan wicket thum lain 9 runs chauh a pe a, player of the match-a thlan a ni.

India leh New Zealand hian November 25 aṭanin Test match an khel leh dawn. Test match hmasa berah hian Virat Kohli a la hahdam dawn avangin Ajinkya Rahane-a'n captain hna a chelh ang.

T20 World Cup zawhah Kohli-a'n captain hna a chawlhsan tur thu a sawi a, hemi a nih avang hian T20 bika India captain chu Rohit Sharma a ni tawh. Test-ah erawh Kohli a la captain zui dawn a, second Test aṭangin a rawn inlan ṭan dawn a ni.