Lyon leh Marseille inkhel zo thei lo

French Ligue 1 season kal laiah buaina a chhuak fo. Pathianni zan Lyon leh Marseille te pawh minute nga bak an inkhel hman lo, pawn lam aṭangin Dimitri Payet chu a luah vawm a ni a, match tih tawp zui nghal a ni.

Match referee Ruddy Buquet-a'n thil awmdan a thlir a, player-te chu dressing room lamah luhtir an ni. Darkar hnih a liam hnuah pawh mikhual Marseille team lam hi inkhel turin an chhuak tawh lo.

August thla khan Nice leh Marseille inkhelh laiin buaina a lo chhuak tawh bawk a, hemi ṭum hian West Ham midfielder hlui Payet bawk hi a corner pet tur an lo vawm tawh bawk - Nice hi an point paihsak an lo ni tawh.

Season tira Marseille match hmasa berah pawh buaina a chhuak. Montpellier nen an inkhelh ṭumin Marseille midfielder Valentin Roniger chu vawm fuh a lo ni tawh bawk a, season chanve pawh an hman tlin hmain khelmualah buaina ṭum thum ngawt an tawk ta.

Tun ṭuma Groupama Stadium-a thil thleng hi chhui zui nghal a ni a, thuneitu lam chuan Payet vawmtu hi man a nih tawh thu an sawi a, eng angin nge club lamin hremna an tawh dawn tih erawh hriat a la ni lo.

Lyon CEO Jean-Michel Aulas chuan, "Thil thleng avang khan pawi kan ti a, a bik takin hliam tuartu Payet chungah ngaihdam kan dil takzet. Kan naute khan inkhelh chhunzawm tur a ni em tih an ngaichang reng a, mahse referee ruahmanna angin an khel zawm ta lo," a ti.