Real Madrid: Eng nge an an zel dawn?

Pathianni zan dar 11:00-ah Eibar mikhualin Real Madrid-in bul an ṭan dawn a, an inkhelhna hi Santiago Bernabeu nen a in ang lo riaua i lo hria a nih pawhin kan dem lo che - Real hian an khelmual hmingthang hi an sak ṭhat mek avangin an hmang thei dawn lo. 

Real inkhelhna tur hmun hi an training complex chhunga mi Alfredo di Stefano Stadium a ni a, mi 6,000 lenna niin Bernabeu nen chuan a inthlau hle - reserve team-in inkhelh nan an hmang tlangpui ṭhin.

Madrid khaw club hian Covid-19 vanga season chawlh a nih hmaa an match hnuhnung pangaah vawi khat chiah chak an nei a, vawi khat an khingpui inhnehtawkpuiin vawi thum ngawt an tlawm!

Real hian an match hnuhnung pangaah hian goal ruk chauh an khung a, tlarhma lam hi an buaina tih a chiang - hetihrual hian Eden Hazard leh Marco Asensio te chu an hliam a dam tawh a, hei hian an buaina a chhawk zangkhai thei tura ngaih a ni. 

Hriat tel tur erawh Hazard hi Chelsea-a a khelh angin a la khel thei lo a, a inhliam hma khan Spanish club tan match 15 a khelhah goal khat chiah a khung! Asensio hian tun season-ah match a la khel miah lo a, ngai awh tur chuan hun a la duh bawk ang. 

Karim Benzema bawk hi Real tana innghahna a ni leh dawn a, ani hian league match 26 a khelhah goal 14 a khung tawh - mahse, heng zinga goal hnih chauh hi January hnu lama a khung a ni a, kum 2020-ah beisei a la phak lo. 

French striker chhiar tel lohin Real hian forward dang pasarih an la nei a, tun season-ah La Liga an khel vek tawh - Hazard, Gareth Bale leh Luka Jovic te an awm chungin forward pasarihin tun season-a La Liga-a goal an khung belhkhawm chu goal 12 chauh a ni!

Real hian point hnih lekin Barca an thlau tih hre chungin bul an ṭan ṭha leh dawn a, tawlhthluk a rem lo tih chu Zinedine Zidane hi a hrechiangtu a ni. Barca lehpel ngei tumin theihtawp an chhuah ang.