Portugal tan point a pawimawh

Cristiano Ronaldo a awm chuan Portugal tan beisei ngam loh khawpa sang a awm bik lo, Real Madrid forward hian World Cup khelh laiah goal li a khung leh tawh avangin an ram hi last 16 lut thei dinhmunah a dinpui mek. Zanin dar 11:30 hian Group B chinfel a ni dawn - Portugal leh Iran an intum ang a, group hmahruaitu Spain chuan tla hmasa ber Morocco an hmachhawn bawk ang.

Match hnih an khelh tawhah Spain leh Portugal ten point li an hmu tawh, pathumna ni lai Iran hian point thum an hmu thung. Carlos Queiroz-a naute hi thih leh dam kara leng mek an ni a, knock out round lut turin chak ngei ngei an ngai. Portugal tan erawh a thiam 16 zinga tel turin point hmuh a tawk.

Portuguese inbeihna

Iran coach Carlos Queiroz hi Portuguese a ni a, Team Melli (Iran sawina) a enkawl hma hian an ram junior leh senior team a enkawl tawh. Club lamah pawh Sir Alex Ferguson thachhang dawlin Manchester United enkawl hna a thawk tawh, Spanish club lian Real Madrid coach a ni tawh bawk - football khawvelah chuan tawnhriat a nei ṭha hle.

Kum 65 mi Queiroz hian tunah chuan an ram team a hmachhawn dawn a, Football Federation of Iran (FFIRI) tana hnathawk a nih ang ngeiin an ram lakah zahngaihna lantir a tum lo ang. Tun hma lama a hriat chian tawh Ronaldo dân dan tur pawh a hre hle tura ngaih a ni.

2010 World Cup-ah khan Portugal hi Spain hneh loin last 16 aṭangin an tla a, an chak loh chhanah Ronaldo chuan an coach Queiroz a puh - an inkar boruak a ṭhat loh phah hle. Portugal-in 2014 World Cup-ah beisei phak lo mah se 2016 Euro champion an ni thei a, Russia-a goal li khung tawh Ronaldo-a'n amah kaihruai tawhtu hmaah goal khung a chak khawp ang.

Iran-in Morocco an hneh hnuah Spain lakah ṭha takin an khel zui. Ball thiam rual hmaah Queiroz-a'n a naute a remkhawm pui thiam hle a, goal khat chhuah mah se an goal khung chu Video assistant referees (VAR) hmanga hnawl sak an ni. Asia team ṭhain European champion laka fiahna hautak an hmachhawn tur hi a hmuhnawm dawn.

Ram pahnihte hi 2006 World Cup group stage-ah an intawng tawh a, Portugal lamin 2-0 in hnehna an chang - an goal hnunhnung zawk hi Ronaldo khung a ni. Khatih hun laia rawlthar duhawm kha ram tan captain a ni tawh a, kha inkhela inlan zingah Ronaldo chiah zanina inkhel leh thei tur a ni.

Hierro a fimkhur

Mi tam tak hmuh dan chuan Spain tan tla chiang tawh Morocco chu awlsam taka hneh theih an ni ang. Mahse, Fernando Hierro erawhin ngaihdan dang a nei, an group match hnuhnung ber chu chetsual theihna a nih thu a sawi.

Spain hi hmahruaitu ni mah se an hmabak hi a awlsam vek bik lo. Portugal leh Iran an inhnehtawk a nih a, La Roja hi goal hnih china an chak lo a nih chuan an la tla thei - fimkhur takin khelh a la ngai tihna a ni.

World Cup ṭan hma lawk aṭanga Spain enkawltu Hierro chuan, "Kan tawnhriat tawh ngaihtuah letin kan match khelh tur ang hi chu hriatthiam a harsa hle. Kan khingpuite hian beisei tur nei tawh lo mah se, an ram leh mimal hmingṭhat nan theihtawp an chhuah dawn," tiin a sawi. An match hnuhnung zawka hnehna an chan dan thlirkirin Hierro chuan an chak nawn a beisei thung.

Kum 50 mi Hierro chuan, "Portugal nena kan inkhelh aṭang khan thil kan zir chho zel a, eng team mai pawh hi hmachhawn an harsa em em tih kan hre tawh. Dawhtheihna nen fimkhur tak chungin Morocco kan hmachhawn ang," a ti a, fimkhur a tum.