England chakna Kane-a goal thum

Nizan khan Nizhny Novgorod Stadium-ah Harry Kane-a goal thum hmangin England chuan Panama 6-1 in an sawp a, Tottenham striker Kane hi Gary Lineker (1986 v Poland) hnuah England player zinga World Cup-a hattrick siam leh thei hmasa ber a ni.

Gareth Southgate-a nauten inkhel an thunun hneh hle, a vawi khat nana World Cup khel Panama lakah zahngaihna an lantir lo. Spurs duhlai Kane hattrick bakah Manchester City defender John Stones chuan goal hnih khungin, midfielder Jesse Lingard-a'n goal khat a thawh ve bawk. Hun tawp dawn lama Panama defender Felipe Baloy goal khungin kawngro su tawh lo mah se an ramin World Cup goal an neih hmasa ber a nih avangin a hlu.

England-in Panama an hneh hma hian Inrinni zan khan Belgium chuan Tunisia 5-2 in an sawp tawh bawk. Three Lions leh Red Devils te hian point ruk ve ve an hmu. World Cup Group G aṭangin England leh Belgium ten last 16 an lut chiang ta a, match hnih an khelh hnua point la hmu lo Panama leh Tunisia tan erawh beisei tur a awm tawh lo thung.

Belgium leh England ten June 28, Ningani zan dar 11:30-ah an group match hnuhnung ber an khel ang a, hmahruaitu nih inchuhna inkhel a ni ang. Beisei nei tawh lo Tunisia leh Panama te inkhel turin awmzia nei tawh dawn lo mah se, ram tana football inelna ngaihhlut bera inlan an nih avangin an hmingṭhat nan tih takzetin an khel tho ang.

Belgium an thiam

Inrinni zan Spartak Stadium-a inkhelah Belgium lamin an goal hmasa ber khung turin minute ruk bak an nghah a ngai lo. Chelsea midfielder Eden Hazard chuan ama penalty hlawhchhuah a khung, striker Romelu Lukaku chuan an goal hnihna a khung zui zat bawk.

Minute 18-naah Tunisia chuan rin loh takin Dylan Bronn hmangin an sut ṭhen. Amaherawhchu, team ṭha zawk Belgium an hlauhawm chhunzawm a, chawlhlawk hmain Manchester United striker Lukaku-a'n ṭha zetin tun World Cup-a a goal lina khung lehin Golden Boot dawng tura a elpui Cristiano Ronaldo a nih rual chiah.

Red Devils captain Hazard-a'n second half ṭan tirah an goal lina khungin, substitute Michy Batshuayi chuan hun tawp hma chiahin an goal hnuhnung ber a khung bawk. Hun tawp hamrik a rik ruala Wahbi Khazri goal khungin Tunisia tana beiseina a chhi nung zo tawh lo.

Roberto Martinez-a nauten a tir aṭanga a tawp thlengin inkhel an thunun a, Manchester City midfielder Kevin de Bruyne chu inkhel khaikhawmtu pawimawh niin, Napoli hmatawng Dries Mertens-a'n goal khung lo mah se na taka goal an nawr theihna thahrui pawimawh a ni bawk. Belgium inkhel a hmuhnawm a, 1986 World Cup palina hian an thlen san ber ṭum an tawng a nih pawhin a mak lo ang.

Belgium manager Martinez chuan England nen an inkhelh hunah a player a siksawi nasat tur thu a sawi lawk a, "Lukaku (ke rek), Hazard (chawn) leh Mertens (ke rek) ten hliam tenau an neih chu enfiah a ngai," tiin a sawi bawk.