Chicharito-a'n goal 50-na a khung

Mexico chuan Inrinni zan khan South Korea 2-1 in an hneh a, Javier Hernandez chuan ram tana a goal 50-na a khung a, man of the match-ah thlan a ni bawk.

Manchester United striker hluiin goal a khung lai hi a pu Tomas Balcazar chuan a hmunah a en a, kum 87 mi hi 1954 World Cup khan Mexico tan a khel a ni.

Chicharito chuan, "Mimal hlawhtlinna hi team tan ka hlan a, player leh coaching staff tel lo chuan engmah ka tithei lo a ni," tiin a sawi.

An khelh hmabak thlirin Hernandez chuan, "Euro C'ship-a Greece hlawhtlinna te, Premier League-a Leicester sulhnu ang kha World Cup-ah hian chhui ve kan tum dawn a ni," tiin beiseina sang tak an nei thu sawi.