World Cup Champion lai Germany an nung thar

Germany-in Mexico an ngam loh avangin pressure an ngah a, Sweden-in point khat hlawh chhuah pawi ti loa an khelh avangin an duh angin an khel thei lo a, match hnihnaah pawh an talbuai tho.

Harsatna belhchhah turin midfielder Sebastian Rudy chu inhliam vangin first half-ah lakchhuah a ṭul - Rudy hi 2014-a Aizawla lo kal Hoffenfiem team member kha ni mah se, khatih hunlai khan ram tana a inkhelh vangin Lammualah a inkhel ve lo.

Second half-ah vanneihna beiseiin Mario Gomez an luhtir. Ani hian a ball khawih hmasak ber chu Marco Reus goal khung tur siam sak nan a hmang a, Borussia Dortmund forward hian a khup hmanga a tih goal avangin Germany an vannei.

Minute 82-naah Jerome Boateng chu hnawhchhuah a ni a, Germany buaina a belhchhah. Player 10 an nih hnuah Joachim Low-a'n chak duhin Jonas Hector lachhuakin Julian Brandt a luhtir a, Bayer Leverkusen winger hian goal ban a pet per a. Hemi hma hian Sweden keeper Robin Olsen chuan ṭha takin Mario Gomez-a tauh a dan sak bawk.

Injury time minute nganaah Toni Kroos-a'n a ball pet thiamna a rawn pholang a, goal an chhuahna tura mawhphurtu hian box pawn chiah sir lama an freekick hmuh chu a pet goal.

World Cup hnuhnung paliah champion lai France, Italy leh Spain ten knockout stage an thleng zo lo a, Germany-in an chhunzawm dawn niin lang hman mah se, Kroos-a'n a chhandam.

Chakna goal khungtu Kroos chuan, "Sweden goal khung kha ka thiam loh a ni a, a tawpah erawh ka thungrulin ka hria. Hun tawp dawnah chakna goal kan khung chauh a ni thei a, chak erawh kan phu zawk a ni," a ti.

Germany boss Joachim Low chuan, "Ka lawmna em em chu goal khata kan hnufual chungin kan buai phah lo a, beisei kan nei reng. Injury time-a goal kan khung avangin kan vannei ngei a, chutih rualin khatiang dinhmun thleng tur khan beisei kan nei a ni," tiin a naute a fak.