Germany Chhamdamna Kroos

FIFA World Cup champion lai Germany player leh ṭantute chungah thlantui leh mittui a far kawp hnuah Toni Kroos a rawn lang a, player 10-a khel Die Mannschaft chhandamin an awm a, ṭum hnih chak tawh lo South Korea-in beiseina an neih phah.

Football ropuina chuan Germany tan hlimna a rawn thlen a, he ropuina phena nunrawnna chuan Sweden a tingui a, Mexico a ṭhâwng tel bawk. Group F-ah point ruk hmu tawh aṭanga point hmu lo thlengin awm mah se second round lut tura beisei nei vek an la ni.

Inrinni zanah Mexico-in Group F hmahruaitu ni chhunzawm turin Rostov Arena-ah South Korea chu Carlos Vela penalty (26') leh Javier Hernandez (66') te goal hmangin 2-1 in an hneh a, Taegeuk Warriors tan Son Heung-min chuan injury time minute thumnaah siphurh a sut ṭhen.

Fisht Stadium-ah inkhel hnuhnung zawk khelh a ni a, Sweden-in minute 32-naa Ola Toivonen goal hmangin Germany lakah hma an hruai a, defensive game khawng ṭha tak an khelh bawk avangin champion lai an talbuai hle. Second half ṭan aṭanga minute thumna lekah Marco Reus hmangin Germany-in an si phurh sut mah se an mamawh point thum hlawh chhuak tura ṭangkai goal aiin red card an hlawh chhuak hmasa a, minute 82-naah defender Jerome Boateng chu hnawhchhuah a ni.

Minute 90-ah inkhel tawp ta se Mexico-in knockout stage an lut ang a, Sweden tan pawh second round lut turin El Tri laka point khat hlawhchhuah a tawk ang. Amaherawhchu minute nga hun pekbelh a ni a, injury time-ah pawh minute nganaah Toni Kroos chuan freekick aṭangin mawi zetin a pet goal.

Germany-in nunna thar an nei a, ngaihngam taka awm tawh Mexico leh Sweden-te inkhel tur chu 'thih leh dam inkhel' a ni zui ta. Inkhel pakhat zawka Germany leh South Korea inkhel tur pawh en liam theih a ni ta lo, Taegeuk Warriors-in champion lai an hneh chuan second round an la lut thei tlat.