Kan vanduai – Sweden coach

Sweden-in tlarhnung an rem phui ṭhap a, counter attack hmanga vaw let turin an inring reng thung. German ral lian an tawng nghal a, amaherawhchu an insiamrem hret hret a, goal hmaah an hlauhawm zawk.

Kum 31 mi Marcus Berg-a'n German defender Antonio Rudiger tihsual nangchingin keeper Manuel Neuer chiah a hmachhawn a, Jerome Boateng chuan Swede forward hi ball khawih si loin a titlu a, ball pet hman tho mah se Neuer-a'n a dan sak.

Sweden manager Jan Andersson leh a hoten penalty an beisei a, pek an ni lo. Replay thlirin penalty ngei tur niin lang mah se referee Szymon Marciniak chuan VAR inrawlhna turah a ngai lo.

Polish referee hian Argentina leh Iceland inkhelh ṭumin inkhel a kaihruai tawh bawk a, Iceland player Birkir Saevarsson chuan Christian Pavon chu box chhungah titlu mah se VAR a inrawlhtir lo a, 1-1 in inkhel a tawp.

Minute 32-naah Toni Kroos pass sual vangin Sweden-in hma an hruai tho a, Ola Toivonen-a'n mawi zeta keeper Manuel Neuer pet khumin a goal. Sweden hian ball chang tlem zawk siin team ṭha zawk an ni a, amaherawhchu second half-ah an ṭang tluan thei ta lo.

Sweden manager Janne Andersson chuan, "Thil thleng kha ka hmu chiang lo a, amaherawhchu a hmutute chuan penalty a nih thu an sawi. VAR system awm tawh lai a, referee-in a thutlukna a kaltlangpui kha kan vanduai a. Kan khelh dan thlirin point hmuh kan phu a ni," tiin an vanduai thu a sawi.

Andersson chuan sawi chhunzawmin, "Mimal emaw kan khelh danah sawisel tur ka hre lo. Ka career-ah chuan tuna thil thleng hian min la ṭhawng ber a, chutihrualin kan group a rawn nung thar a. Kan chak loh avanga kan hliam na kan tih dam a, ṭha zawka Mexico kan hmachhawn a ṭul a ni," tiin beisei an la neih thu a sawi.