Serbia ngamtu Switzerland dinhmun a ṭha

Zirtawpni zan khan Swit­zerland chuan Serbia lakah si phur hmasa zet mah se 2-1 in an hneh let a, last 16 lut turin din­hmun ṭha takah an ding.

Serbia tan Aleksandar Mitro­vic chuan goal hmahruai a khung a, mahse Switzerland-in Granit Xhaka leh Xherdan Shaqiri hmangin an chhanglet.

Swiss team laka an tlawm avangin Serbia dinhmun a chhe sawt a, match tawp berah Brazil an tum dawn avangin a harsa lehzual ang.

Switzerland hian beisei tur nei tawh lo Costa Rica chu Nilaini zan­ah an tum dawn a, last 16 lut turin draw result a tawk. Serbia tan Brazil hneh ngei a ngai thung a, Selecao tan draw result a tawk thung.

Chawlhlawk pawimawhna!

Serbia-in inkhel ṭan aṭanga minute ngana lekah Mitrovic hmang­in goal hmahruai an khung a, Newcastle United striker hi ram tan a match hnuhnung 15-ah goal 15 (13 goals, 2 assists)-ah a inrawlh tawh.

Match hmasa bera Costa Rica hneh tawh Serbia-in hma takah goal an khung avangin chak tura rin zawk an ni a, an player neih dan en pawhin thil awm lo a ni lo - first half an thunun.

Chawlhawk hman a ni a, he hun chhawrtu zawk chu Switzerland an ni. First half-a ball vawi nga chiah khawih hman striker Haris Seferovic chu lakchhuah a ni a, second half-ah Switzerland khel a nung sawt.

Second half ṭan aṭanga minute sarihna lekah Arsenal midfielder Xhaka chuan shot ṭha zet hmangin an si phurh a sut a, beiseina a nung. Draw result nen team pahnih inkhel a tawp mai dawn nia a lan hnuah Shaqiri-a'n player class sang a nihna a pholang a, khelmual chanve vel aṭanga ball khalh tlangin chakna goal a khung.

Football leh Politics!

Shaqiri leh Xhaka ten an goal khung lawm nan an awm zawnah an kut 'X' angin an dah a, hei hi Albania flag-a mupui lu pahnih awm chhinchhiahna a ni.

Kum 1990 chho khan Kosovo War an tih chu Yugoslavia ram tih phel a nih hnuah a thleng a, player pahnih hi Kosovo mi, Albanian thisen kai an ni a, Kosovo War lai hian Serbia chuan Kosovo hi nasa takin an bei a, North Atlantic Treaty Organisation (NATO) inrawlh hnuah a tawp chauh.

Xhaka pa hi a hunlaiin Yugoslavia-ah political prisoner niin kum thum leh a chanve chhung lunginah a tang a, Shaqiri hi naupan laia Switzerland a pem a ni. Player pahnihin an 'huat' Serbia laka an goal khung dan hian sawizui a hlawh a, Serbian fan-te chuan an pahnih hian an au el nasa hle.

Switzerland manager Vladimir Petkovic chuan, "Football leh politics hi kan kai kawp tur a ni lo," tiin a naute chet dan a pawm bik lo a, Serbian fan-te chet dan a dem zui bawk.