Aizawlah 3BL Basketball League a hlawhtling

3BL Basketball League round 2 chu Zirtawpni leh Inrinni zan khan Hawla Indoor Stadium, Aizawlah khelh a ni a, India ram leh foreign player ṭhaten tualchhung basketball ngainatute tan hmuhnawm an phochhuah sak.

Inelna hi India ram hmun hrang hrangah neih tur a ni a, round 1-ah Delhi Hoopers chu Delhi-ah an siam a, Aizawla round 2 khelhah pawh Delhi Hoopers tho an champion.

Inelna kalphung

3BL Basketball League-ah hian team 12 an awm a, group paliah pathum ṭheuha sem darh an ni. Ni khatnaah hian group stage hi khelh zawh a ni a, ni hnihnaah hian knockout stage chin zawng hi khelh zawk vek a ni thung.

Inelna kalhmang hi basketball khelh dan pangngai nen a inang lo a, minute 10 chhung chauh khelh tur a ni a, point 21 hmu hmasa zawk chu chak zawka puan an ni bawk.

QF-ah Aizawl Legends

Aizawl Legends-ah American player Kyle Benton a la tel theih loh avangin Mizo hlangin an khelh a ṭul a, amaherawhchu hma sawn hretin group stage paltlangin quarterfinal an lut.

Aizawl Legends hian Hyderabad Ballers hneh lo mah se Bangalore Machas chu 19-16 in an hneh a, knockout stage an lut. Quarterfinal-ah Aizawl an vaduai a, Chennai Icons chu 20-21 in an hneh lo.

Inderbir Singh telna

Indian thisen kai Inderbir Singh Gill telna Delhi Hoopers chu a tawpah an chungnung a, American basketball player hi MVP atan thlan niin final-ah Chennai Icons an hneh.

Hawla Indoor Stadium-ah Inderbir Singh thiam zia a lang a, chutihrualin Aizawl Legends-in point khat chauha an hneh loh Chennai Icons-in final an thlen avangin Mizo basketball player-te pawhin hma an sawn hle niin a lang bawk.