Argentina beiseina siamtu Nigeria

Nigeria-in 2-0 in Iceland an hneh a, an tan last 16 luh beiseina an insiam rualin Argentina beiseina thi ṭep tawh chu an chhem nun sak thar ve leh bawk.

Argentina-in Lionel Messi an nei a, Nigeria-in Ahmed Musa an nei thung. Messi-a'n match hnihah goal a la khung lo mai a ni lo a, Iceland lakah penalty a hlah.

Musa erawhin Iceland tlarhnung lakah buaina a nei lo a, goal hnih khung nan he team hi a hmang–a goal khung pahnih hi striker goal dik tak a ni a, 'class' tia kan sawi ṭhin kha kan hmu.

Musa nena khaikhin rual loh khawpa thiam Messi-a'n Argentina tan lawmna tur a la thlen lo a, Leicester City striker Musa-a'n Argentina leh Super Eagles lawmna a thlen kawp thung.

Danglamna Musa

Nigeria-in an match hmasa berah 2-0 in Croatia an ngam lo a, Iceland lakah an chak lo leh a nih ngat chuan hma taka Russia mangṭha tu Egypt leh Morocco hnung an zui dawn tihna a ni.

Argentina laka inremkhawm fuh em em Iceland lakah beisei angin bul an ṭan lo a, minute 45 chhungin shot an nei miah lo–tun World Cup a first half-a goal shot nei miah lo awmchhun an ni nghal!

Nigeria fans thinphu ran rual zetin Argentina fans thinphu a rang a, Super Eagles an chak loh chuan an beiseina a bo dawn tih an hria. Mahse, chawlhlawk laiin African team-in thu ṭha an ngai thla tih a lang a, second half-ah chuan team dang an ni.

Foxes aṭanga CSKA Moscow-a loan-a khelhtir Musa-a'n Victor Moses hnen aṭanga a ball hmuh chu ṭha zetin a la a, a pet goal. Minute 75-na a ni a, Musa bawk kan hmu–duh thala Iceland defender a bum phar hnuah an goal hnih a khung a, Nigeria tan World Cup-a goal khung hnem ber (4) nichungin an ram hnehna a chanpui.

Iceland an tuiral

Argentina chelh thei an nih avangin Iceland tan Nigeria laka chak beisei ngam chi a ni a, inkhel bul pawh an ṭan fuh–an thiampuipa Gylfi Sigurdsson chuan minute nga chhung lekin Nigeria goalkeeper chu vawi hnih ngawt a enchhin hman.

Sigurdsson-a'n minute nga chhunga shot vawi hnih a neih hi Argentina laka minute 90 chhung zawnga target-a shot an neih zat nen a in ang! Second half-ah erawh Nigeria an chungnung zawk a, Iceland an tuiral.

World Cup khel tawh zinga ram te ber hian goal hnih an chhuah hnuah 'comeback-na' hun ṭha an nei a, VAR hmangin penalty pek an ni. Mahse, an team beiseina Sigurdsson chuan goal-ah a chantir thei lo.

Iceland-in goal an khung loh avangin Nigeria goalkeeper, kum 19 leh ni 237 mi Francis Uzoho chuan record a siam ve nghal a, World Cup-a goalkeeper clean sheet nei thei naupang ber dawttu a ni–kum 1966-a North Korea-in Italy 1-0 a an hneh ṭuma si ban nghaktu Li Chan-myong (kum 19 leh ni 198) chiah a tluk lo.

Kawng hawnin a awm!

Croatia–Match hmasa pahnihah hnehna an chan avangin last 16 an lut chiang tawh a, Iceland an draw chauh pawhin group hmahruaitu an ni chiang ang.

Nigeria–Argentina an hneh chuan last 16 an lut ang. Iceland-in Croatia an hneh lo a nih chuan draw ringawt pawh last 16 luh nan a tawk ang.

Iceland–Croatia an hneh a, Nigeria-in Argentina an hneh loh a ngai ang a, chutah pawh goal difference a la pawimawh cheu ang.

Argentina–Nigeria an hneh a, Croatia-in Iceland an hneh bawk chuan last 16 an lut ang.

A hma mah mah...

Nigeria boss Gernot Rohr chuan, "World Cup khelh ṭan hmaa ka ngaihdan chu he hmunah hian inzir tura kal kan ni. Ka ngaihdanah chuan tun World Cup hi beiseina sang tak kan neih nan chuan a la hma hret a, 2022-ah chuan tun ai hian kan inpeih lehzual ang.

"Mahse, tunah pawh hian Argentina laka hnehna chang turin chance ṭha tak kan nei a ni. He ka team, kum naupang tak awmkhawmna ni si a ka duh em em chu inngaihtlawmna, thawhhona ṭha leh a tawp thlenga beih duhna thinlung kan put hi a ni," a ti.

Iceland boss Heimir Hallgrimsson chuan, "Last 16 luh beiseina kan la nei thei hi a mak zawk a ni. Tlawm miah loa World Cup khar kan inbeisei hauh lo a, mahse chak loh hi chu tawrh thiam a har ṭhin. Kan hriat tur erawh kan la tlang thei tih hi a ni," tiin a sawi.

Croatia nena an inkhel tur thlir nghalin Iceland coach chuan, "Kum li chhungin vawi li kan intawng tawh a, nupa inngeih lo, inṭhen tum reng mai, inṭhen hleithei si lo ang hi kan ni ber a," a ti a, a hrilhfiah thiam hle.