Argentina leh Messi tan fiahna hautak
Zanin dar 11:30 hian Argentina leh Nigeria ten an group match hnuhnung ber an khel dawn a, Lionel Messi leh a ṭhianten fiahna hautak leh rit tak an hmachhawn lai en turin khawvel mipui chuan Russia ram khelmual pakhat Saint Petersburg Stadium lam an hawi ṭhup dawn.
Argentina hian last 16 lut tur chuan hnehna an chan ngei ngei a ngai tawh a, inkhel lehlamah tling chiang tawh Croatia chu Iceland lakah an tlawm loh a ngai tel tawh bawk. Nigeria tan tlang turin point thum hmuh a tawk ve thung - hnehna chan tumin an intawng dawn.
Kawng a awm
South America qialifier an khelh lai khan Argentina hi dinhmun ṭha takah an ding ngai meuh lo. Match hnuhnung ber an khelh pawhin an la him lo a, tling lo thei dinhmuna ding chungin Ecuador an pan. Ecuador mualah minute khatna lekah goal an chhuah nghal a, Russia pan lo thei dinhmunah an ding hman.
Amaherawhchu, hun harsa an tawh laiin La Albiceleste hian ram dangin an neih ve loh mamawh chhanna an nei - a hming chu Messi a ni. Barcelona thiampuipa hian goal thum hmanga chhang letin an ram hi hnehna a chanpui a, World Cup khel turin an tling zui bawk.
World Cup an khel ta ngei a, beisei angin result ṭha an nei thei chuang lo. Zanina an chak zo lo a nih chuan Argentina hian puanthauh telin an ram lam an pan thei tawh dawn, dinhmun harsa leh khirhkhan taka an awm lai hian Messi an mamawhna a zual ngei ang.
Kum 31 tling hlim Messi-a'n tun World Cup bikah goal khung tumin vawi 12 pet tawh mah se a la hlawhtling lo. Nigeria hmaah 'nil' a thiang tawh lo. Messi tan World Cup match hnuhnung ber a ni thei tawh a, chutih rualin a ropui zia an ziah ṭan nana hun pawimawh tak pakhatah a chantir thei bawk.
Engtin nge niang?
Qualifier match 18 an khelh aṭanga goal 19 chiah khung thei Argentina hian an hming chuan hmatawng an nei ṭha a ni mai thei, ram tana an sulhnu en erawh chuan chhuan tur a tam lo. Russia-ah pawh match hnih an khelh tawhah goal khat chiah an la khung!
Tlarhmaah Messi chu khawihchet thiang lo a ni a, ani thlawp tur hi tun thleng chuan an la thlang fuh tawk lo. Iceland laka goal khungtu Sergio Aguero leh Juventus striker Gonzalo Higuain te bukin an awm dawn, a lut zawkin club lama an khelh angin champion player an nih zia an lantir a ngai tawh ang.
Argentina buaina langsar pakhat chu midfield a ni. Inelna neih ṭan hma deuhin Ever Banega chuan hliam tenau a nei a, an match hmasa berah inkhel bul a ṭan loh chhana ngaih a ni. Mahse, match hnihnaah pawh Banega hian hmun a chang chuang lo. Mascherano-a'n tlarhnung lam a puih a ngai leh dawn a, Sevilla midfielder ball thiam Banega hi hmatawng tana ball pe chhuak turin a pawimawh ang.
Argentine coach Sampaoli hi goal veng tur thlan chungchangah pawh a rilru a insual ve hlein a rinawm. Croatia goal hmahruai 'siamsak' tu Willy Caballero aiah Franco Armani a lut mai thei. Goal venhim kawngah defender rinrawl Nicolas Otamendi chu player dangte hokhawmtu a ni dawn avangin boruak sangah pawh 'cool' a pawimawh dawn.
Rawlthar beiseina
Russia pan ram 32 zingah Nigeria hi player naupang rual deuh ber an ni a, an kum zat hi chawhrualin 25 vel a ni a, an khingpui tur Argentina erawh kum 29 vela chawlhrual an ni thung a ni.
Super Eagles hi thaza rual an nih avangin an inkhel a hmuhnawm a, an hmuhnwmna ti zual turin goal khung thei Ahmed Musa an nei. Leicester City player, CSKA Moscow tan loan hmanga khel mek Musa hian World Cup-ah goal li khung tawhin an ram tana khung hnem ber a ni mek, kum upa leh che muang Argentina tlarhnung tan a hnawk sak thei ang.
Kum 25 mi Musa hian Agrentina nen an inkhelh tur chu, "Thi leh dam kara leng" tiin a sawi tawh a, Iceland an hneh avangin inrintawkna an neih tur thu a sawi bawk. Premier League lama tawnhriat nei Wilfred Ndidi, Victor Moses, Kelechi Iheanacho leh Alex Iwobi te hi captain John Obi Mikel-a'n a ho khawm ṭha a nih phawt chuan South American team hneh turin an ṭha ve tawh.
Ram pahnihte hi vawi riat an intawng tawh a, World Cup bikah hian vawi li an inkhel tawh - Argentina an la chak fai vek. Hnehna chang vek mah se La Albiceleste hi inchhuang thei bik an ni lo, goal khat aia tamin hnehna an la chang ngai lo a ni.