Djokovic hnehtu Cilic a champion

Pathianni zan khan Marin Cilic chuan Novak Djokovic laka set hmasa a hloh hnuah 5-7, 7-6 (7/4), 6-3 in hnehna a chang let a, a vawi hnih nan Fever-Tree Championship nomawi a chawi.

Kum 29 mi Cilic hian a zawnin final vawi thum ngawt chu Queen's Club-ah hian a chak lo zawkah a ṭang tawh, kuminah pawh chak lo zawk ngei tura ngaih a ni hman. Set hnihna an khelh laiin Djokovic-a'n 5-4 a hma hruaiin match point a hmu hman, mahse Cilic hian huaisen taka bei letin hnehna a chang.

Croatian tlangval Cilic hian 2012 khan he hmunah hian nomawi a lo chawi tawh bawk a, a tan chuan July 2 aṭanga khelh ṭan tur Wimbledon inbuatsaihna ṭha tak a ni nghal ang. Hnehna chang tur hian darkar hnih leh minute 57 a mamawh, Queen's Club final an khelh tawh zinga rei ber a ni.

Grand Slam vawi khat champion tawh Cilic chuan, "Season hmasa khan match point hmu chungin a chak lo zawkah ka ṭang a, kuminah chuan a letling zawngin thil a kal ta, ka tan hlawhtlinna lawmawm tak a ni. Inkhel hautak tak a ni a, point hnuhnung ber ka hmuh thleng khan chawlh zeuh a thiang lo," tiin a sawi.