England-in Australia an whitewash

Jos Buttler chuan thi loin run 110 an siam a, England-in ODI vawi nganaah Australia chu Pathianni khan wicket khatin an hneh. England hian a vawi khat nan cricket-a an hmelma Australia chu 5-0 in an whitewash.

Old Trafford-ah Australia-in an bat hmasa a, over 34.4-ah run 205 siamin an thi fai vek. Opener pahnih Travis Head leh Aaron Finch ten over ruk lekah run 58 siam nghal mah se bowler Moeen Ali an ngam lo.

Pakistani thisen kai Ali hian run 46 pein wicket li ngawt a la. Australian batsman zingah Head (56 runs), Alex Carey (44) leh D'Arcy Short (47) tih loh chu chhuan tam run vaw chhuak an awm lo.

England tan bul ṭantute che ṭha lo mah se Jos Buttler-a'n run 110 zet a vaw chhuak a, Australia target a hniam nachungin mualneitu hian 48.3 over-ah hnehna an chang chauh a, wicket kua zet an hloh hman bawk.

England captain Eoin Morgan chuan, "Jos kha a che ṭha tak meuh meuh a, mit dawivaih ang mai a ni. Tupawhin a khelh dan kha kan chhuang a, midang zawng erawh kan khel ṭha lo. Jos khan kan tum ram min thlen pui a ni," tiin century siamtu a fak.