Hnehna changtu Hamilton-a'n hma a hruai

Pathianni zana tlan zawh tak French Grand Prix-ah Lewis Hamilton chu pakhatna a ni a, Mercedes driver hian point 145 hmuin driver championship lamah hmahruaitu a ni leh ta.

World champion vawi li ni tawh hian a tir aṭanga a tawp thleng hnehna chang turin harsatna lian tham a tawk lo, tun season chhunga vawi thum a chakna niin, car intlansiakna sang berah hian a vawi 65 nan hnehna a chang chiah.

Championship lama Hamilton-a elpui ber Sebastian Vettel chu panganaah a thleng a, Ferrari driver hian point 131 hmuin season dang ang bawkin anni pahnih hi an inel chho leh dawn tih a hriat theih.

Tun season chhungin Formula 1 intlansiak hi vawi 21 a awm dawn a, heng zinga pariat chu an tlan zo tawh. June 29 hian Austrian Grand Prix an tlan leh dawn a, November 23 hian Abu Dhabi-ah a hmawr bawkna neih a ni ang.