France kuta innghat Australia

France-in kum 1998-a an rama an champion hnuah FIFA World Cup-ah nomawi an la chawi leh lo a, Russia ramah Australia leh Peru te hnehin kawng dik an zawh mek.

Les Bleus hmaah kawng hnih a awm a, duh thlang thei dinhmunah an ding. Didier Deschamps hote hian zanin dar 7:30 hian Denmark an hmachhawn dawn a, point an hlawh chhuak thei a nih chuan last 16-ah Argentina an tawng thei a, chak loh erawh chuan Croatia a nih a rinawm a, duh thlang thei an ni.

Australia erawh France kutah an innghat. Bert van Marwijk hote hian zanin dar 7:30 tho hian tla tawh Peru an hmachhawn dawn a, knockout stage lut tur chuan an chak aṭul bakah France-in Denmark an hneh sak a ngai bawk.

France-in point ruk an hmu tawh chungin an khelh danah beisei an phak lo a, Australia an hneh ṭumin VAR leh Goalline Technology hman ṭangkai a nih hnuah 2-1 in an chak ṭawk.

Deschamps-a'n Peru nen an inkhelh ṭumin khelh dan hmang thlak hretin Ousmane Dembele leh Corentin Tolisso te aiah tawnhriat ngah zawk Olivier Giroud leh Blaise Matuidi te dahlutin an khel ṭha sawt a, an chakna zat erawh goal khat chauh a ni.

Les Bleus coach Didier Deschamps chuan khel ṭha tawk lo mah se knockout stage an thlen avangin a lawm thu a sawi a, amaherawhchu an lawm a la kim lo tih a lang.

Denmark coach Age Ha­reide chuan thla hmasa khan Les Bleus chuan danglamna bik an neih loh thu a sawi a, French midfielder Corentin Tolisso chuan, "Hemi chungchang hi kan sawi ho a, a thusawi hi a dik lo tih chhan let kan duh," tiin hneh ngei an tum thu a sawi.

Hareide hian Paul Pogba hairstyle chungchang pawh, "Kei pawhin a ṭul a nih chuan ka sam pawh ka ti sen mai ang. Mahse keini chuan hetiang lam ai hian khelmualah kan thiamna lantir kan ngai pawimawh zawk," tiin a deu sawh. Man­chester United midfielder Pogba hian a hairstyle bakah a thiam­na lantir a duh a ni thei a, amaherawhchu Blaise Matuidi nen yellow card an hmuh tawh avangin Denmark nen hian bench-ah hun an hmang thei bawk.

French player Tolisso leh Pogba te chuan Croatia pum­pelh an duhthu an sawi ve ve a, 1998 WC champion hian Argentina hmachhawn an pawisa lo tihna a ni a, Denmark tan hnehna chan a harsa dawn.

Eriksen-a telna

Denmark innghahna Christian Eriksen-a'n Peru an hneh ṭumin Yussuf Poulsen goal khung tur a siam sak a, Tottenham Hotspur mid­fielder hian Australia nen an inhnehtawk ṭumin goal hmahruai a khung leh a, zaninah pawh a chet ṭhat a ṭul ang.

Coach Hareide tana thu lawmawm lo awm erawh RB Leipzig forward Poulsen chu match hmasa pahniha yellow card hmuh avangin zanin hian a inlan ve thei dawn lo. Denmark hian tlarhma lam chu an siksawi a ngai dawn a, chutihrualin second round lut tura point khat a tawk avangin chak an duh avangin goal venhim a pawimawh dawn.

PSG forward Kylian Mbap­pe chuan Peru lakah goal awmchhun a khung a, France tana World Cup-a goal khung thei naupang ber hi Denmark hian an ven uluk a ṭul dawn a ni.

Australia ve thung

Socceroos hian World Cup hnuhnung berah khan Ange Postecoglou hoa khelin an khingpui Chile (3-1), Netherlands (3-2) leh Spain (3-0) te an hneh lo vek a, tun ṭumah hian an khel ṭha zawk tih chu a chiang a, amaherawhchu an tawpna erawh group stage tho a ni thei bawk.

Dutch manager Bert van Marwijk chuan a player-te chu 'cool' turin a fuih a, an rilru tipaukhauh turin an ngen bawk. An training-na hmunah pass sual leh tihsual dang a awmin pawi ti loa khelh chhunzawm tir an ni a, an rilru put hmang pawh a dik viaua sawi a ni. Germany midfielder Mesut Ozil-a'n match hmasa ber khelh dan chu 'uṭawk thi' nena khaikhin tawk an awm a, hemi aṭanga teh chuan Australia erawh Kangaroo dam ṭha ver vawr nen an khaikhin thung.

Australia hian pressure nei loa an khel thei a nih chuan Peru hneh theih dan kawng a awm dawn a, amaherawhchu last 16 lut tur chuan France-in Denmark an hneh sak a ṭul ang.