Japan an hmuhnawm; Senegal nen inhnehtawk

Samurai Blue tlanchhiatsan turin Teranga Lions an che rang tawk lo a, Teranga Lions hliam tur khawpin Samurai Blue a 'hriam' tawk lo bawk.

Pathianni zan Group H inkhelah Japan-in inkhel hmuhnawm pho chhuak mah se Senegal laka hnehna chanpui turin a tawk zo lo a, Teranga Lions nen hian goal hnih ve ve khungin an inhnehtawk.

Senegal hian khel ṭha lo zawk nichungin Sadio Mane leh Moussa Wague hmangin vawi hnih ngawt hma an hruai a, mahse Samurai Blue-in Yuya Osako leh Keisuke Honda hmangin an chhanglet–team pahnih tan last 16 lut turin an match tawp bera point khat hmuh theih a tawk ve ve.

Team ṭha Japan

Japan hian World Cup khelh nan thla khat vel chauh a awm tawh tih khan coach an thlak a, player a thlan

ṭhin dan avanga sawisel hlawh tak Vahid Halilhodzic chu banin a hmun ruakah hian Akira Nishino ruat a ni.

Japanese coach enkawlna hnuaiah beiseina neih thiam a harsa a, tunah erawh kum 63 mi manager hi an infak siak mek–a naute a remkhawm ṭha a, an game a zirin player thlak dan tur a hria a, team an inlungrual a ni tih a hriat bawk.

Minute 11-na leka goalkeeper Eiji Kawashima-a'n a tihsual vanga Mane-a'n goal a khung kha chuan Poland hnehtu lakah Samurai Blue hi an thamral mai dawn niin a lang hman a, mahse chutiang erawh a ni lo.

Yuto Nagatomo-a'n penalty area-ah ṭha zeta ball a lakluh hnuin Galatasaray defender ball ken lai hi Takashi Inui chuan a lo lak sak a, season thar aṭanga Real Betis tana khel tur Inui hian goal kil sirah mawi zetin a pet lut.

Senegal bawk chu...

Japan an phur chhunzawm a, Senegal hmu ve ṭhin bawk mah ila Blue Samurai hi team hmuhnawm zawk chu an ni–mahse Yuya Osako-a'n vawi hnih ngawt chance a neihah a chhawr lo ve ve.

Season thar aṭanga Werder Bremen tana khel tur striker hian vawi khat bar a pet per a, cross ball aṭanga lokal chu pal fuha lut mai thei ni mah se a tawk hman lo bawk!

Japan-in an thawhrim an chawlhsan lo a, hmahruaina goal khung nawntu erawh Senegal bawk an ni. Japan an chesual a, Senegal defender Youssouf Sabaly chu duhtawka ball khawihna hun an siamsak hnuah Bordeaux defender hian M'Baye Niang tan a siamsak.

AC Milan striker-in a duh angin pet hman lo mah se a tihsual hi kum 19 mi Wague chuan a rawn nang hman a, Belgian club K.A.S. Eupen defender hian kawh zetin a pet lut.

Japan ral lian!

Samurai Blue-in a vawi hnih nan goal chhuah mah se zam phah nan erawh an hmang lo a, Senegal goal-ah an nawr chhunzawm–Keisuke Honda leh Shinji Okazaki luhtir an ni a, Japan squad chhahna a lang.

AC Milan midfielder hlui Honda-a'n khelmualah minute ruk bak hun a hmang hman lo–Senegal goalkeeper keeper Khadim N'Diaye ball clear ṭhat tawk loh nangchingin si phurh sutna goal a khung.

Mexican club Pachuca tana khel Honda hian Colombia lakah khan danglamna a lo thlen tawh bawk–an chakna goal Osako khung kha corner ṭha zet a pet aṭanga lut a ni.

Kum li liam taa point khat chauh hmu chunga World Cup mangṭhatu team hian tunah chuan match hnih khelin point li an nei der tawh a, an khelh tawh dan aṭanga chhut chuan Samurai Blue hian a sang zawk thleng turin theihna an nei.