Colombia-in Poland an thawn haw

Colombia-in match hmasa berah Japan ngam lo mah se an match hnihnaah an zia tak tak an chhuah a, Poland chu 3-0 a sawpin last 16 luh beiseina an nei thar ve leh ta–Poland tan erawh hawna tur ticket ngaihtuah a hun tawh thung.

South American team tan Yerry Mina, Radamel Falcao leh Juan Cuadrado ten goal khat ṭheuh an khung a, Robert Lewandowski leh a ṭhianten chhanletna tur an nei thei lo.

Barcelona defender Mina hian match hmasaa hliam vanga bench aṭanga luhtir James Rodriguez ball siamsak chu a tauh lut a, Brazil 2014-a hliam vanga inlan thei lo Falcao chuan striker class sang a la ni reng tih pholangin second half-ah an goal hnihna a khung.

Poland-in si an phur chungin an nawr let thei lo a, a bet zawk an ni tluan chhuak zak–Robert Lewandowski meuh pawhin ball 'supply' a hmuh ṭhat miau loh avangin danglamna a thlen thei lo a, Bayern Munich striker hi World Cup-a a inlan hmasak berah a 'nil' tluang zel.

Falcao-a'n an goal hnihna a khung aṭanga minute nga hnu lawkah Cuadrado chuan an goal thumna a khung–Juventus winger goal khungna kawngah James chu fak phu a ni.

Bayern Munich forward hian defender pathum pet kanin ṭha zetin Cuadrado tan a siamsak a, Chelsea winger hlui Cuadrado hian ṭha taka um lutin goal-ah a chantir.

Colombia boss Jose Pekerman chuan, "Hnehna chan ngei mamawh chungin kan khel a, team pahnih hi a tira chak lo ve ve kan nih avangin tihsual kan nei thiang lo. Chu mawhphurhna chu zo takin kan hlen a, tunah chuan dinhmun ṭha takah kan awm leh ta," tiin a sawi.