Three Lions hahum ri a ring

England-in match hnih an khel tawh a, last 16 an lut chiang tawh. Three Lions hian goal riat an khung der tawh a, goal hnih chiah an la chhuah thung.

Player naupang rual, manager tawnhriat ngah loin a kaihhruai an nih avangin England lakah beiseina a sang lo a, tun hma zawng aiin uchuak taka tarlang ṭhintu English media meuh pawh an reh.

Mahse, England-in match hnih an khelh meuh chuan media chaw tui ber an ni leh der tawh a, match hnih lekah goal riat an khung meuh chuan Three Lions lakah beiseina a sang leh tawh a, media pawh an awm hle hle thei lo.

Mahse maw...

England-in an match hmasa pahnihah an khel ṭha ngei a, an tluksual changtute ṭan chhan la ni erawh 'team ṭha' an la hmachhawn lo tih hi a ni - a chhanna erawh an hmu thuai dawn.

Ningani zanah England hian Belgium an hmachhawn dawn a, he inkhel tur hi England hi eng ang chiaha ṭha nge an lo nih hriat nan a ṭha ang. Red Devils-in bul an ṭan ṭha ve tho a, 3-0 a Panama an sawp hnuah 5-2 in Tunisia an hneh - match hnihah England nen an goal khung zat a in ang a, an chhuah zat a in ang bawk.

He team hian tlarhmaah Romelu Lukaku, Eden Hazard leh Dries Mertens te ho an nei a, England tlarhnungah Kieran Trippier, John Stones leh Kyle Walker te ho chuan Panama leh Tunisia tlarhma lakah ngawt ai chuan hna an ngah ang.

Hriat tel atana ṭha erawh team pahnih hian last 16 an lut chiang tawh a, group hmahruaitu nih chiah chu an inhmachhawn chhan tur a ni tawh - manager pahnihin player dang enchhin nan an hmang thei. Chumi awmzia chu England hian last 16 hma lo chu 'fiahna' tak tak an hmachhawn lo thei.

Captain Fantastic

World Cup khel tura England an fehchhuah hma khan zawhna tam tak a piang a, chung zinga England ṭantute rilru tihahtu leh buaina chu Three Lions captain armband tuin nge hreng ang tih hi a ni.

Jordan Henderson leh Harry Kane chu hming langsar a ni a, player pahnihin tawnhriat ngah tawh mah se major tournament meuha captain tura rin ngam an harsa.

Gareth Southgate-a'n huaisen takin thutlukna a siam a, Kane-a hnenah ram captain mawhphurhna sang tak a hlan. Kum 24 mi lek nichungin Kane-a'n a mawhphurhna a hlen zawh zia a lang - goal riat an khung zinga goal nga chu Kane-a khung a ni!

Tottenham Hotspur striker hi London club tan season season li chhung goal 25 chuang khung ziah thei a ni a, England-in thlen san an tum chuan a ṭangkai chhunzawm zel ang.

Fak phu Southgate

South Africa 2010-ah England-in last 16 thleng mah se Germany lakah 4-1 in an mualpho a, beiseina sang zawk nen kum li hnuah Brazil pan leh mah se point khat chiah hmu chungin World Cup an mangṭha.

Kum li a liam leh a, beiseina nei sang lo tak chungin Russia an pan - mahse he team hian rin an hlawh loh ber ṭumah football hmuhnawm an pho chhuak a, an game a mawi em em bawk - fak phu chu Gareth Southgate a ni.

Euro 2016-a last 16 aṭanga an tlak khan England manager Roy Hodgson a bang nghal a, a hmun ruak luahtu Sam Allardyce-a'n match khat bak a enkawl hman lo.

England Under 21 coach Southgate ruat a ni a, English football hrechiangtu manager an ruat hi tun thleng chuan a la sual lo. Kum 47 mi manager hian World Cup hma aṭang tawhin 3-5-2 system chu a naute a bel tir a, he formation hi tun thleng chuan an la hlawhtlinpui.

A la tawk lo

Kil tin aṭangin England-in fakna an dawng a, mahse Southgate erawh a lawm a la kim lo. English manager hian Panama laka 6-1 a an chakna inkhelah meuh pawh lawm lohna tur a hmu a, hmasawnna tur an la neih thu a sawi.

Middlesbrough manager hlui chuan, "Kan bul ṭan danah khan ka lawm lo a, goal kan chhuah avangin ka lawm lo bawk. Sawisel tur hrim hrim ka zawng ve pawh a ni mai thei," a ti!

Southgate chuan, "Inrintawkna nei tura goal kan khung belh zel hi ka lawm a ni," a ti a, inenchhin nana Belgium an hman dawn leh dawn loh chungchangah, "Player zawng zawng tan hmun a awm a, chutihrualin match zawng zawnga chak kan duh," a ti bawk.

England captain Kane chuan, "A pawimawh ber chu kan ti thei tih rinna kan neih hi a ni," tiin World Cup nomawi chawi tura inrintawk an mamawh thu a sawi.