Tla thei leh tling thei vek

Zanin dar 7:30 hian FIFA World Cup group F chinfel a ni dawn. Ekaterinburg Arena-ah Mexico leh Sweden te an inhmachhawn ang a, Germany leh South Korea te Kazan Arena-ah an inkhel bawk ang.

Beisei nei Sweden

Sweden coach Janne An­ders­son chuan, "Champion lai kan el tawk tih kan lantir tawh a, chak lo mah ila kan khelh dan khan inrintawkna nasa tak min pe," tiin a sawi a, captain Andreas Granqvist pawhin, "Mexico player-te hi mimal takin an thiam a, counter attack-ah an hlauhawm," tiin fimkhur a ṭul tur thu a sawi.

Mexico-in Javier Hernán­dez, Hirving Lozano leh Carlos Vela te an nei a, an thiam vangin point ruk an hmu a, amaherawhchu inkhel dang result vangin second round an la lut lo. Sweden lakah El Tri hi inthlahdah thei an la ni lo.

Champion lai Germany

Germany-in Mexico an hneh loh hnuah insiamṭha hretin Sweden an hneh a, an chakna chhan tak erawh vanneihna a ni. An tlarhnung pawp tih phui chu Joachim Low hna hmasa a ni dawn a, hrem vangin Jerome Boateng khelh thei dawn lo mah se Mats Hummels a dam tawh a, ani hi Antonio Rüdiger aiin Bayern Munich tana khelhpui ṭhin Niklas Sule nen inkawp tura ngaih a ni.

Tlarhmaah Germany duhthu a la sam lo a, Timo Werner chu hmatawng turin bil deuh mah se mual sir aṭanga a nawr nat tho avangin an chhawr chhunzawm a rinawm a, Mario Gomez pawhin bul a ṭan a nih pawhin a mak lo ang. Joachim Low hote hi an phur vanglai tak a ni a, an khingpui tur South Korea pawh hi tla tawha inngai tawh beiseina nei leh an nih avangin world champion hmaah hlauhthawnna nei loin an khel thei ang.

South Korea fapa chuam Son Heung-min chuan Mexico an hmachhawn ṭumin goal a khung tawh a, inkhelh banah tla tawha a inngaih avangin a insum zo lo. Tottenham forward Son-a mittui a hul tawh a, Germany tlarhnung tan ngaih ṭha taka awmna chi a ni lo ang.