World Cup khel upa ber El Hadary

Football khawmpui lian ber World Cup-ah kum 45 mi Essam El Hadary a inlan a, Egypt captain leh keeper ni bawk hian an ram chu Saudi Arabia lakah 2-1 in chak loh pui mah se World Cup khel thei upa ber a ni.

Thawhṭan zan khan Volgograd Arena-ah Group A aṭanga beisei nei tawh lo ram pahnih an intawng a, Egypt fa chuam Mohamed Salah-a'n goal hmahruai khung mah se, an lamah goal hnih a luh zui avangin match thum an khelah point an hmu lo a, group mawngphah luahtu nichungin Russia an mangṭha.

Old Is Gold

Eng kawngah pawh upa leh senior zawk ten zah an hlawh ṭhin a, El Hadary pawh player dangte zah leh chhuan tham a ni. El Hadary hian kum 45 leh ni 161-a upa ni chungin Saudi Arabia a hmachhawn a, Colombia keeper Faryd Mondragon record lo siam tawh chu a khum. 2014 World Cup khan Mondragon-a'n kum 43 leh ni thuma upa ni chungin a thlengtu Brazil a lo hmachhawn tawh.

Egypt keeper El Hadary hian minute 41-naah fiahna hmasa a hmachhawn, Saudi Arabia forward Fahad Al Muwallad-a penalty pet chu ṭha zetin an dan sak. Chawlhlawk hma chiahin video assistant referee rawn a nih hnuah penalty an chawi nawn a - Salman Al Faraj ball pet erawh El Hadary tan dan theih a ni tawh lo.

Kum 45 mi El Hadary hian lawm a hlawhin a khel ṭha zui a, Hussain Al-Mogahwi leh Mohannad Aseri te ball tauh lut ngei tura lang tawh a dân dan aṭangin khawvel keeper ṭhate zingah a tel phak tih a nemnghet nawn. Hun pek belha Salem Al Dawsari ball pet lirh dang tur erawhin a che rang tawk tawh lo.

World Cup khel thei upa ber Essam El Hadary chuan, "Egyptian mipui lakah kei leh ka ṭhiante hmingin ngaihdam ka dil. Theihtawp kan chhuah a, mahse vawi thum kan khelh chhung khan kan vennei miau si lo - he hi football chu a ni," tiin a sawi.

Salah goal

Champions League final-a hliam tuar Mohamed Salah-a'n an match hmasa berah Uruguay a hmachhawn lo a, an match hnihnaah a thlengtu Russia lakah penalty hmangin goal a khung nghal.

Liverpool forward hian Saudi Arabia hmaah pawh player naran chunglam a nih zia a lantir. Minute 22-naah midfielder Abdallah El-a'n ball kang a pek chu box pawnah la thlaiin, keeper Yasser Al-Mosailem dan phak loin a pet lut nghal.

Ball kal lai lak thlak hnua rang taka khung zui hi 'Salah Goal' kan hmuh fo ang kha a ni. 1934 hnu lamah Egypt-in World Cup bika 'open play' aṭanga goal an khung leh hmasak ber a ni.

Kum 26 mi Salah hian si khat faia hma an hruai laiin a goal hnihna khung theihna hun nei mah se, keeper Al-Mosailem chiah a hmachhawn tawh hnuah pet khum leh mah se goal zawnah a kal lo hlauh. Second half-ah erawh Egypt an bet zawk a, an hmachhuan ber Salah tan pawh goal khung belh theihna hun a inhawng zui lo.

Saudi Arabia coach Juan Antonio Pizzi chuan, "Salah-a'n goal a khung hma kha chuan hmunawl kan siamsak lo a, goal kan chhuah hnuah insiam ṭhain huaisen takin point thum kan sual chhuak a ni," tiin a sawi.