Murray a chak ve leh ta

World number 1 hlui Andy Murray chuan kum khat deuhthaw hnuah hnehna a chang ve leh ta. Thawhṭanni zan khan Eastbourne championship-ah Murray hi a inlan a, a match hmasa berah Stan Wawrinka chu darkar khat leh minute 17 chhungin 6-1, 6-3 in a hneh.

Grand Slam vawi thum champion tawh pahnih inkhel hi a nung tawk lo a, hliam vanga hun rei tak buaina nei tawh an nih avangin an ṭhat vanglai ang chu an ni lo. Vawi 18 an intawn tawhah Murray hian a vawi riat nan hnehna a chang ta chiah a, Swiss tlangval Wawrinka-a'n record a la nei ṭha zawk.

Kum 31 mi Murray hi a khel bawr na avanga kum khat deuh thaw a chawlh reng hnuah kar hmasa khan a rawn kir a, Queen's Club-ah inlan mah se Nick Kyrgios hneh loin a tla nghal. Wimbledon inbuatsaih nan a zawnin tournament a khel a, tun ṭuma hnehna a chang hi a tan chanchin ṭha a ni ang.

Wawrinka pawh hi khup hliam vanga thla ruk chawl tawh a ni a, January thla a khelh zawh tak Australian Open-ah rawn kir mah se result ṭha a la nei leh thei lo, kum 33 mi a nih tawh avangin a tan tho chhuak leh tur chuan a harsa tawh mai thei - hun ṭha a liam zo ta tihna erawh a la ni bik lo.

Hmeichhe inelna lamah Caroline Wozniacki chuan Camila Giorgi lakah 6-2, 6-3 in hnehna a chang nghal a, seeded pakhatna Wozniacki hian Johanna Konta leh Aleksandra Kruni te inkhela a chak zawk a hmachhawn leh ang.

Khawtual nula leh rinkai pawh ni phak lo Harriet Dart chuan Kristyna Pliskova chu 7-5, 3-6, 6-3 a a hneh laiin, Heather Watson erawh Kristina Mladenovic lakah 7-6, 5-7, 3-6 in a chak lo thung.