Iran lakah Portugal an vannei

Football khawvelah Asia khawlmualpui an hniam ta bik lo. Iran leh Portugal an inchai tawk a, 1-1 in inkhel a tawp. Mehdi Taremi chuan injury time-ah chance ṭha hlah lo se European champion zawk hi Russia ram chhuahsan tur an ni a, Cristiano Ronaldo telna team hian vannei takin knockout stage an lut.

Thawhṭanni zan inkhelah hian Ricardo Quaresma chuan a ke dingah pawh pawn lam hmangin minute 45-naah a zai lut a, Portuguese veteran midfielder hian a thiam thil a la bel hle. Iran an tlawm duh lo a, Ronaldo-a'n penalty a hlah zui avangin chak beiseina an neih chhunzawm a, injury time-ah Karim Ansarifard hmangin siphurh an sut. Carlos Queiroz hoten last 16 lut turin chak an mamawh a, winger Mehdi Taremi chuan keeper chauh a hmachhawn hnuah goal zawnah a pet thei lo.

Referee-in hun tawp ham rik ham zuiin Iran player-te chhuatah an tlu sawp nghal a, an thawhrim leh huaisen rah an seng loh avangin an biangah lungngaihna mittui a luang a. Portugal erawh mangchhia aṭanga an talchhuah theih avangin last 16-ah group B hmahruaiu Uruguay nen Inrinni zan dar 11:30 hian Fisht Stadium-ah an inhmachhawn ang.

Hmuhnawm tura duan

Iran coach Carlos Queiroz-a'n a enkawl tawh Portugal team a hrechiang a, an thiampuipa Ronaldo phei chu a duhsak fal ṭhin avanga a 'fapa' ang hiala an chhuah a ni. Asia aiawhin chak mamawh mah se team enkawltu berin an khingpui team a hrechiang a, Portugal chu him sa tia sawi theih a ni lo.

Ṭan phatah Ronaldo rawn inlar nghal mah se Real Madrid forward a langsar zui lo a, Iran-in goal khung tuma an khelh ngam ve tho avangin inkhel a hmuhnawm. First half-ah goal khat chiah a lut a, goal awmchhun erawh Quaresma chanchina sawi zui reng tlak ni tur khawpa mawi a ni.

Kum 34 leh ni 272-a upa Quaresma hi Iran player Yahya Golmohammadi-a'n kum 2006-a Mexico lama kum 35 leh ni 84-a upa nichunga goal a khung hnua World Cup-a khung leh thei upa ber a ni.

Ennawm leh inhnialna

Second half-ah VAR ṭum thum hman a ni a, Ronaldo-a'n a penalty hlawhchhuah chu goal-ah a chantir thei lo. Portugal captain hian inelna lianah ram tan penalty vawi li a pet a, vawi hnih chiah a khung thei a, 50% chiah a khung thei tihna a ni.

Iran-in penalty an chawi danah an lungawi lo a, hnual nan hmang loin infuih phur nan an hmang thung. Inkhel boruak sangah beisei pha lo Ronaldo insum zo loin hnawhchhuah theih dinhmuna a din hnuah a him hlauh a, Iran beisei loh ang zela referee-in thutlukna a siam avangin Carlos Queiroz pawh insum zo loin referee zilhna hial a dawng.

A tawpah Iran-in VAR hmangin penalty an hmu thung a, Ansarifard-a'n a pet goal. Queiroz-a hoten chak theihna hun ṭha an nei a, Mehdi Taremi chungah mipui mit a fu a, Qatar club Al Gharafa SC forward pet zawhah Portugal an thaw huai a, Iran beiseina a tawp.