Chak zo lo Spain an tlang

Spain-in World Cup group stage-a an match hnuhnung berah Morocco hneh zo lo mah se hun pek belhah draw result an hlawhchhuah avangin last 16 an khel dawn chiang.

Thawhṭanni zan khan Spain hian Morocco chu 2-2 in an inhnehtawkpui. African team-in beisei tur nei tawh lo mah se hmingṭhatna hlawhchhuah tuma an khelh avangin hmachhawn an hautak a, La Roja hi a si phur zawkah vawi hnih ngawt an ṭang!

Morocco tan Khalid Boutaib chuan goal hmahruai a khung hnuah Spain tan Isco-a'n a chhanglet a, hun tawp nan minute kua chiah a awm tawh tiha Youssef En-Nesyri-a'n African team tan a khung kha chuan Spain an tlawm dawn niin a lang - mahse Iago Aspas chuan hun pek belhah Spain si phurh a sut a, 2-2 in an ṭin.

Spain-in group hmahruaitu nichungin last 16 an lut a, quarterfinal luh inchuhna inkhelah hian inelna thlengtu Russia chu an hmachhawn dawn.

Beisei phak lo

World Cup ṭan hmaa boruak nei lian ber chu Spain tih ngam a ni a, La Roja boruak neih dan erawh thil duhawm a ni lo. Match hmasa ber khel turin ni hnih chiah an nei tawh tihah coach Julen Lopetegui chu an ban a, Real Madrid-in an coach ni tura an lakluh thu an puan vang a ni.

Spain football team sporting director Fernando Hierro chu he team enkawl tur hian ruat nghal a ni a, a match hmasa berah Portugal chu 3-3 in an inhnehtawkpui nghal. Harsa takin Iran chu 1-0 in an hneh chhunzawm a, Morocco lakah an vannei leh ta.

Morocco laka Spain goal chhuah hmasak thlirlet chuan inthlahdah vang tih a lang a, Andres Iniesta leh captain Sergio Ramos te ball in pass fuh tawk lo nangchingtu Khalid Boutaib chuan David de Gea kap karah ṭha zetin a pet lut.

Spain tlarhnung a nghing fo a, 1-1 a nih hnuah pawh goal khungtu Boutaib leh Nordin Amrabat ten goal khungna hun an nei a, Morocco goal hnihnaah Ramos-a'n Malaga striker En-Nesyri a veng ṭha tawk lo bawk.

Mahse, an thiam!

World Cup ṭan hmaa team boruak fuh loin Spain team-ah nghawng a nei tih hai rual a ni lo a, game pumpui thlir erawhin he team hian an thiam an la theihnghilh lo tih a lang a, an si phurh hmasa zawk an sut danah pawh 'class' kan hmu.

Barcelona legend Iniesta-a'n an goal hmasa luhna kawnga a thiam loh thup mawi nan Isco tan mawi zetin a siamsak - a tir taka ball khalh luttu chu Isco a ni a, Diego Costa a pek hnuah Atletico Madrid striker hian Iniesta a pe a, kum 34 mi midfielder hian a 'lam' luhpui hnuah Isco a pe leh bawk. Team goal dik tak a ni.

Spain goal hnihna erawh corner aṭanga ball kal a ni a, Aspas-a'n Spain team-ah tel a phu tih pholangin a khung.

Goal khungtu Isco chuan, "Kan hmaah chona tak tak a inchhawp leh ta a, mahse he team-ah hian ka rinna ka nghat tlat a ni. Russia kan tum dawn a, inelna thlengtu, thlawptu nei ṭha tak an nih avangin a harsa dawn. Mahse, friendly match-ah kan inhmachhawn tawh a, kan hrechiang a ni," a ti.

November 2017 khan team pahnih hi friendly match-ah an inkhel tawh a, 3-3 in an inhnehtawk.