Brazil dinhmun a him lo?

Zanin dar 11:30-ah Brazil an inlan dawn a, Selecao awmna Group E chanchin hi a ngaihnawm dawn - Brazil, Serbia leh Switzerland ten last 16 luh beiseina an la nei vek!

Brazil hian zanin dar 11:30-ah Serbia an inkhelhpui dawn a, last 16 lut turin draw result a tawk - Serbia tan hnehna chan ngei a ṭul thung. Switzerland-in dar 11:30-ah vek beisei tur nei tawh lo Costa Rica an hmachhawn dawn a, Swiss team tan pawh last 16 lut turin inhnehtawk bawk a tawk.

Serbian striker Aleksandar Mitrovic chuan, "Brazil hneh theih inbeisei lo ni ila ka puanthuah ka tel ang a, kan ram lam panin ka haw tawh ang," a ti a, Brazil hneh a inring - a hmuhnawm dawn.

Beisei phak lo Brazil?

Tite enkawlna hnuaia harhna chang Brazil-in beiseina sang tak nen Russia an pan a, an match hmasa berah Switzerland an inhnehtawkpui nghal. Samba Boys hian an match hnihnaah pawh Costa Rica hneh turin minute 90 piahlam an nghah thlen a ngai.

Khelh hniha point li hmuh hi team tam zawk tan result chhia ni lo mah se Brazil tan erawh beisei loh result a ni a, match tawp ber thlengin tla thei dinhmunah an din phah.

Hetihruala hriat tel atana ṭha erawh Brazil hi an match hmasa pahnihah an khel chhia a ni hran lo a, goal hmaa an vanduaina chu puh tur lian ber a ni - zaninah erawh vanduai nawn a thiang lo a, chhuanlamin last 16 a hruai thleng dawn lo.

Neymar a dam tawh!

Brazil ṭantute tana thu hriat nuam tak chu Neymar a dam tawh tih hi a ni. Paris Saint-Germain forward hian Russia kal hmain friendly match-ah goal hnih a khung a, World Cup-a an match hmasa berah erawh a nil.

February-a a inhliam avanga PSG tana season tawp pawh khar thei lo forward hi major tournament meuh khel tur chuan a la dam chiang lo a ni ang tih chu ngaihdan a ni a, Swiss team an tawn hnu lawkah hian a inhliam bawk.

Mahse, Costa Rica lakah a beisei penalty pek a nih loh hnuin Neymar hian goal a khung a, mittui nen a goal hi a lawm. Kum 26 mi forward chuan, "Ka zinkawngah engmah awlsam a awm lo a, tunah eng vangin nge a awlsam thut ang? Kan beiseina chu a la nung reng a ni," a ti - tunah chuan Neymar a dam ta!

Jesus chungah beiseina

Kum 2015 khan FIFA Under 20 World Cup final-ah khan Brazil leh Serbia an intawng a, New Zealand-a inelnaah hian Serbia-in extra time-a an goal hmangin Brazil chu 2-1 in an hneh a, an senior team-in zaninah phuba lak sakna remchang an nei dawn.

FIFA U20 2015 World Cup-a Brazil squad player zingah khan Gabriel Jesus chu Russia-a kal awmchhun a ni a, Manchester City forward chuan Serbia nena an intawn kha thlirkirin, "Team pahnih tan kha game kha inkhel harsa tak a ni a, zaninah chuan result a danglam tawh ka beisei," a ti a, phuba lak a tum.

Kum 21 mi forward hi rawlthar sawi 'hot' ber a nichungin Russia-ah goal a la khung lo a, zanin inkhelah City forward hian Brazil chhandam nan goal a khung an beisei ang.

Brazil leh Tite

Brazil tan zanin hi Tite hoa match 24 an khelhna tur chiah a ni - Corinthians boss hlui hnuaiah hetih hun chhung hian vawi 18 hnehna an chang a, vawi li an khingpui inhnehtawkpuiin vawi khat chiah an tlawm.

Tite hnuaiah goal 50 an khung tawh a, an lama goal lut zat chu goal ruk chiah a ni. Tite hian an khingpui tur a zirin player a thlak danglam ṭhin a, chutiang taka ti tur chuan player a nei ṭha tawk bawk.

Zaninah attacking game a khelh rin a nih avangin goal hnih khung tawh Philippe Coutinho, Paulinho leh Casemiro te midfield-ah a inkawp tir rin a ni a, tlarhmaah Jesus leh Neymar an luh rin niin Willian aia Douglas Costa luhtir a nih pawhin a mak lo ang.