VAR – buaina chingfeltu nge belhchhahtu?

Iran coach Carlos Queiroz chuan Portugal nen an inkhel kaihruaitu referee Enrique Caceres-a'n thutlukna a siam ngam loh avangin Pontia Pilata angin a kut a sil thu a sawi a, Cristiano Ronaldo leh Lionel Messi te pawh dan chunga leng an nih bik loh thu a sawi bawk.

FIFA World Cup-ah a vawi khat nan VAR hman a ni a, kawng hrang hrangah referee-in thutlukna dik siam theih mah se a famkim lohna a lan zel avangin sawiseltute thawm a ri ring. Thawhṭanni zan group B inkhel pahnih a hmuhnawm a, inkhel result leh hmelhmang thlak danglamtu VAR a langsar a, sawi zui a hlawh.

Portugal Vs Iran

VAR 1-na: Minute 50-naah Cristiano Ronaldo chu box chhungah Iran midfielder Saeid Ezatolahi-a'n a titlu a, referee-in penalty a pe lo. VAR hmangin thil thlen dan ennawn a ni leh a, referee-in thutlukna sutin penalty pe mah se Ronaldo penalty pet chu keeper Alireza Beiranvand-a'n a dan sak.

VAR 2-na: Minute 83-naah Ronaldo chuan amah dangtu Iran defender Morteza Pouraliganji chu a kawihsawn hnuah a nghawk niin a lang a, red card pek theihna a nih avangin VAR hmangin an en let. Referee-in red card ni loin yellow card zawk rawn phawrhin penalty hlahtu Ronaldo a him.

VAR 3-na: Injury time-ah Sardar Azmoun chuan box chhungah Cedric-a kut a tauh per a, VAR hmanga en let a nih hnuah referee-in penalty a pe a, Olympiakos forward Karim Ansarifard chuan ṭha zetin a pet goal.

Fak loin a sel

Iran boss Carlos Queiroz chuan, "Chiang takin a nghawk a, red card pek ngei tur a ni. Danah chuan Ronaldo emaw Messi a nih avangin card pek loh tur tih inziak a awm lo. VAR hmang tur hian sum tam tak hman a ni a, inchhung aṭangin mi panga emaw parukin uluk taka an thlir hnuah yellow card tiin thutlukna zuk siam a. Tuin nge mawhphurhna la ta, mawhphurhna la ngam pawh an awm tawh loh hi. Pontia Pilata angin an kut an sil a, thutlukna siam dan tur an thiam lo a, thil thleng pawh an hre lo," tiin bible thu nena khaikhinin VAR a sel.

Bible-ah chuan sualna nei lo Isua Krista chungchangah Pontia Pilata-a'n thutlukna huaisen siam ngam loin a kut a sil a, mipui tihlungawi a thlang. Iran coach pawhin Bible thu lachhuakin referee chet dan sawifiah nan a hmang.

Real Madrid coach hlui chuan sawi chhunzawmin, "Kum 37 chhung football-ah ka inhnamhnawih tawh a, pressure nei loa room chhunga ṭhuin mi zawng zawng hmuh an hmu lo bik kha mak ka ti. Kan lama penalty a nih kha chuan Russian TV in slow motion vawi 5-6 an ti lang a, kan penalty beisei ve na kha chu vawi khat chauh an replay," tiin thuneitute chu ṭan lam neiah a puh.

VAR chungchanga a ngaihdan a thlak thu sawiin Queiroz chuan, "VAR ṭha titu zinga mi ka ni ṭhin a, tunah chuan a hlawhchham tih chu ka thutlukna a ni. FIFA president Infantino hian thutlukna a siam sual tih pawm se mipui tan thutlukna hi thlak leh rawh se," tiin VAR hman zel a duh tawh lo.

VAR a famkim lo

Portugal coach Fernando Santos erawhin, "Thil kha ka ennawn leh lo a, ka ngaihdanah chuan VAR-in a tih tur a ti a, kan pawm mai a ṭul a ni," tiin VAR a ṭhat thu a sawi thung.

Group B inkhel pakhat zawkah pawh VAR a hman a ni. Iran-in penalty an hmuh chiah hian Morocco chuan 2-1 in Spain lakah hma an hruai mek a. Amaherawhchu, Iago Aspas chuan La Roja tan injury time-ah siphurh a sut a, assistant referee-in offside flag a phar. VAR hmanga thil thleng ennawn a nih hnuah referee Ravshan Irmatov-a'n Spain goal hi a pawm sak a, Morocco-in point khat chauh hmuin Russia ram an chhuahsan a ṭul phah.

Morocco coach Herve Renard chuan, "Kan si phurh sutna kha kan en let a, offiside a ni lo a, VAR hmanga an thutlukna kha a dik thlap a, kan pawm. Amaherawhchu ball out lohna lamah corner an pet a, sawisel theih a ni lo nachungin tihsual lian tak niin a lang si. Chutiang bawkin Pique-a'n a ke pahniha a tlawh kha a chhe berah yellow card tur niin a lang," tiin VAR awm hnuah thutlukna zawng zawng a dik loh thu a sawi.

An inhnial zel

Iran leh Portugal inkhela referee kha a vannei takzet. Engtin nge penalty-ah a ngaih reng reng le? Iran khan a tawpah khan goal khung leh chiah se chuan a buai khawp ang. Defender khan a mit a chhing a, yard chanve vel lek a nih bawk avangin handball luih a ni thei lo. Khawvela inelna sang berah VAR an enchhin a ni ber a, a dik thei lo.

- Alan Shearer, England striker hlui

VAR ṭantu ka ni a, buaina chingfeltu tur a ni. Tunah erawh inhnialna a la awm zel a, a chinfelna tur la zawn mek zel a ni. A tawpah chuan referee bawkin thutlukna an siam a, eng thutlukna pawh siam se inhnialna a awm zel ang.

-Didier Drogba, Chelsea striker hlui

VAR-in thutlukna dik a siam chuan a ṭha a ni maiah ka ngai. Ka duh loh zawk erawh player nungchang zawk a ni a, thil thleng apiangah uchuak taka chet an ching. In khawih fuh hlekah pawh tluin referee bulah nasa takin an zualko a, ṭha ka ti lo.

- Pablo Zabaleta, Manchester City full back hlui