Russia aia thiam zawk Uruguay

World Cup thlengtu Russia-in beisei aia ṭhain bul an ṭan a, group match an khar dan erawh duhthusam a ni lo thung. Thawhṭanni zan Group A inkhelah Uruguay chuan player 10 a khel Russia lakah 3-0 in hnehna an chang.

Uruguay hian a vawi nga nan group hmahruaitu nichungin last 16 an lut a, an match lehpekah chuan Portugal an tum dawn a, pahnihna Russia leh Spain an inhmachhawn thung ang. European ram zingah Russia hi Spain (1982) tih lohah chuan World Cup thlengtu nichunga group hmahruaitu ni phak lo hmasa an ni.

Samara Arena-a inkhelah Luis Suarez-a freekick chhuih luh chu goal hnih dangin a zui a, minute 36-na lekah Russia defender Igor Smolnikov chu yellow card vawi hnihna hmuh vangin hnawhchhuah a ni, hun chanve aia rei zawk kim lo chunga an khelh a ngaih phah.

Goal thum

Tling tawh pahnih inkhel mah ni se hmahruaitu inchuhna a nih avangin a pawimawh tho a, minute 10-na lekah Barcelona striker Suarez chuan box pawn chiah aṭangin freekick a chhuih lut. Keeper Igor Akifneev-a'n a ven tur lam a veng ṭha tawk lo a, chutihrualin Uruguay tana goal khung hnem ber Suarez-a'n a pet ṭha tawk bawk.

Stanislav Cherchesov nauten insiamrem nan hun an duh rei a, an buaina belhchhah turin Diego Laxalt ball pet chu Denis Cheryshev-a'n anmahni lamah a ti lut, Akifneev tan dan theih a ni lo. An match hmasa pahniha goal riat khung thei Russia lamin a chhan letna an nei thei lo a, hun tawp hma deuh chiahin Paris St-Germain striker Edinson Cavani-a'n tun World Cup-a a goal hmasa ber a khung zui thung.

Eng nge an sawi?

Uruguay coach Oscar Tabarez chuan, "Hmahruaitu nichunga tlang hi a lawmawm a, lawmna ti zualtu chu goal kan chhuah lo kha a ni," tiin a sawi. Argentina (1998) hnuah Uruguay hi goal chhuah loa group stage paltlang leh thei hmasa ber an ni.

Russia coach Stanislav Cherchesov chuan, "Player tlem zawk kan nih hnuah pawh kan inbei tawk hle a, match dangdai tak kan khelh hi last 16 atana inbuatsaihna ṭha tak a ni," a ti. Marcel Desailly (1998 France World Cup) hnu lamah Russian defender Igor Smolnikov kha goalkeeper ni lo inelna thlengtu player an hnawhchhuah leh hmasa ber a ni.