Santosh Trophy Mizoram aiawh tur a hriat ta

India rama state inelna sang ber Santosh Trophy-a Mizoram aiawh tur chuan nimin khan Lammualah training hnuhnung ber an nei a, vawiin hian qualifying round neihna tur hmun Manipur an pan ang.

Mizoram team hi coach Samson Ramengmawia leh assistant coach HC Zarzoliana ten an enkawl a, kum 21 hnuai lam player 14 lai telin kum 19 hnuai lam panga an awm.

Kum 2014 Santosh Trophy champion Mizoram hi group B-ah Manipur, Nagaland leh Tripura te nen an awm a, group khat aṭangin team khat chiahin final round an lut dawn.

Covid-19 nghawng
Covid-19 vangin MPL8 final hnuah Mizoram chhungah mumal takin football khelh a ni tawh lo a, veng/khua inelna NECS Cup pawh kum 2020-ah khelh ni mah se hri leng vangin an khel zo thei lo. MPL8 final hi December 14, 2019 khan khelh a ni a, Aizawl FC-in Electric Veng FC 2-0 a hnehin an champion.

Santosh Trophy-ah hian I League leh ISL-a khel player te an tel thei lo a, Aizawl FC-in I League an khelh avangin Mizoram tana thlan theih player an tlem phah. Harsatna belhchhah turin hri leng kai vanga paih ngai an awm a, Mizoram senior team naupan ber ṭumah a ngaih theih hial.

Coach Samson Ramengmawia chuan, "Player-te hi kum naupang tak tak an ni hlawm a, tawnhriat nei tlemtein an ho. Enkawl an nuam a, team boruak a ṭha a, theihna nei sang tak tak an nih hlawm avangin kan phur hle. Ka naute hi ka ringtawk," tiin Vanglaini a hrilh a, hri leng vanga chhuanlam siam a tum lo.

A harsa dawn
Mizoram inkhelhna tur hi Khuman Lampak Main Stadium a ni a, Mizote tana Lammual a hlut ang thoin Manipur-in he stadium hi an ngai hlu. I League club Neroca leh Trau ten home match khelh nan an hmang a, entu pawh 35,285 an leng.

Samson-a kaihhruai Mizoram hi November 28, Pathianni hian Tripura nen an inkhel dawn a, November 30, Thawhlehniah Nagaland nen an inhmachhawn leh bawk ang. Match hmasa pahnih hi a harsa tura ngaih a ni lo a, chutihrualin match tawp bera Manipur nen an inkhel hun atan goal difference neih ṭhat a pawimawh dawn.

Mizoramin Santosh Trophy an champion chhun kum 2014 khan Manipur nen hian qualifying round-ah an inhmachhawn a, goal difference nei ṭha zawk Manipur-in inkhelh ṭantirh aṭangin draw tumin hun an khawhral. Amaherawhchu Mizoramin hun tawp dawna R. Laldanmawia (82') leh Zico Zoremsanga (90+5') te goal hmangin 2-0 in an hneh hram a, Lammual khata Mizo mipuiin hna an thawk ṭha bawk.

Tun ṭumah erawh an inkhelna tur hi Lammual ni loin Khuman Lampak Main Stadium a ni tawh dawn a, Manipur-in home advantage an nei ve thung ang. Chutihrualin Mizoram leh Manipur te hi December 2, Ningania an inhmachhawn hmain match hnih an khel dawn a, inelna ṭan hau hmaa Tripura leh Nagaland sawi bo a rem lo. Football-ah chuan eng pawh a thleng thei tlat.

Santosh Trophy chu
Santosh Trophy hnuhnung ber kha Covid-19 vangin final round khelh theih a ni lo. Mizoram hian qualifying round-ah an khingpui Tripura, Arunachal Pradesh leh Assam te an hneh vek. Final round hi kum 2020-a khelh tur ni a, Mizoram thlen tur ni mah se hri leng vangin an ṭhulh.

Mizoram hi Santosh Trophy-ah vawi khat chiah an la champion a, kum 2014 khan coach H. Vanlalthlanga hoin Siliguri-ah nomawi an chawi. Hemi hnu hian ṭum nga Santosh Trophy hi khelh zawh a ni leh tawh. Mizoram hian vawi thum semifinal an lut a, ṭum khat final round group stage paltlang loin kum 2019 khan final round an lut lo.

Santosh Trophy Qualifying Round
Football bika India ram state leh state inelna sang berah team 37 an tel. State hrang hrang bakah union territory leh Services team te an inlan dawn. Team 37 te hi group 10-ah ṭhendarh an ni a, group tina a sang ber ṭheuhin final round an lut ang.

Kuminah National Games a awm dawn avangin tun ṭum Santosh Trophy hi National Games khel tur zawnna a ni nghal ang. National Games hi team riat tan chauh a nih avangin khel pha tur chuan final round luh ngei ngei a ngai.

Mizoram hi National Games-a gold medalist la lai an ni a, inlena hnuhnung ber chu kum 2015-a Kerala a neih a nih khan an champion. Nikum khan Goa-a neih tum ni mah se Covid-19 vangin khelh theih a ni lo.

Group hrang hrangte
East Zone
Group A
1. Jharkhand
2. Odisha (H)
3. Bihar

Group B
1. Chhattisgarh
2. West Bengal (H)
3. Sikkim

North-East Zone
Group A
1. Meghalaya (H)
2. Arunachal Pradesh
3. Assam

Group B
1. Manipur (H)
2. Nagaland
3. Mizoram
4. Tripura

North Zone
Group A
1. Chandigarh (H)
2. Services
3. Jammu and Kashmir
4. Uttar Pradesh
5. Himachal Pradesh

Group B
1. Delhi (H)
2. Punjab
3. Haryana
4. Uttarakhand

West Zone
Group A
1. Gujarat (H)
2. Goa
3. Daman and Diu
4. Dadra and Nagar Haveli

Group B
1. Rajasthan (H)
2. Maharashtra
3. Madhya Pradesh

South Zone
Group A
1. Karnataka (H)
2. Telangana
3. Andhra Pradesh
4. Tamil Nadu

Group B
1. Pondicherry
2. Kerala (H)
3. Lakshadweep
4. Andaman and Nicobar Islands

* Group tin aṭangin pakhatin final round an lut dawn
* Team hming zawha (H) awmna hi a thlengtu zel an ni.

Mizoram Fixtures
November 28, Pathianni
Mizoram 2:30 PM Tripura
November 30, Thawhlehni
Nagaland 2:30 PM Mizoram
December 2, Ningani
Manipur 2:30 PM Mizoram