Zo Keite ril a ṭam tawh!

November 27 a her chhuak ang a, Mizoram mai ni lo, Indian boxing-a ngaihven hlawh pawl 'Zo Keite' NT Lalbiakkima chuan ring chhung a rap leh dawn.

Siaha boxer hian IBA intercontinental title a kawl lai chu Thai boxer Gerttipong Kumsahwat lakah humhim a tum dawn a, Dawrpui Multipurpose Hall-a inhnek tur atan Zo Keite hian a inpeih tawh thu Vanglaini a hrilh.

NT-a chuan, "Tun ang reng renga fit hi ka nei ngai lo a, ka kuttum lek chhuak turin ka inpeih leh tawh. Zo Keite ril a ṭam tawh," a ti a, a inpeih tawh hle.

Mizo boxer NT-a hian coach Lalmuanpuia hnuaiah ngawrh takin training a nei mek a, strength and conditioning coach Biakzuala'n (Gtea) uluk takin training a neihpui reng bawk.

Beisei a sang
LPS Pro fight aṭanga hriat hlawh NT-a te inhnek hi LPS leh Chhimbal app-ah te pay per view hmangin a en theih dawn a, LPS pawt lo leh Mizoram pawna awm tan Chhimbalah hian Rs. 100+tax chawiin a en theih dawn - ni 27 zanah live-in Zo Keite ram chhuak a en theih dawn tihna a ni.

NT-a chuan, "Theihtawp ka chhuah reng a, hmathlir thui tak ka neih avangin tlawm ka duh lo. Tuna ka fight hian ka hmabak fight atan kawng thui takin a su dawn a, ka tan chak loh chi a ni lo, " tiin Vanglaini a hrilh.

Siaha boxer hi India rama boxing agency lar Marine Pro Boxing Promotions nen an thawk dun mek a, Marine aṭang hian fight-a hlawh a neih piahlamah thla tin sum a dawng ṭhin.

A bul ṭanna
NT-a hian kum 2018 khan world number 1 Hasanboy Dusmatov chu President's Cup, Kazakhstan-ah hnehin boxing khawvel a barakhaih a, Indian boxer zinga Olympic gold medalist ni lai hneh thei hmasa ber a ni.

Mahse, hmana hmingṭhatnaah NT-a'n cham reng a duh lo a, thawnthu thar ziah a duh tawh. Mizo boxer lar chuan, "Tunah chuan professional huanga bul ṭan chauh ka la ni a, a sang thei ang ber thlen ka duh.

"India ramah professional boxing-in ngaihven a la hlawh tawk lo a, sang tak thleng pawh kan la tam lo hle. Hei vang hian Mizoram mai ni lo, India tana bung thar kaipuitu nih ka duh a, tun hi ka tan chumi kawng zawhna remchang chu a ni," tiin Vanglaini a hrilh.