Etihad Stadium-ah Messi inlan dawn

Manchester City-in zanin dar 1:30 hian Etihad Stadium-ah Paris Saint-Germain an mikhual dawn a, Lionel Messi-a'n en bik a hlawh ang. Argentina captain Messi hian Barcelona-a amah enkawl tawhtu Pep Guardiola a ngam ṭhin a, Parc des Princes-a an inhmachhawn hmasak zawk ṭum pawhin goal ropui a khung.

Premier League champion hian anmahni ang bawka sum hmang tam PSG hi khualmualah hneh lo mah se group match dang zawngah an chak vek avangin hmahruaitu an ni. Chutihrualin Pep-a'n Barcelona a chhuahsan hnuah Champions League nomawi a la chawi lo a, European champion nih an duh avangin group stage paltlang dawn tho mah se hneh loh an duh lo ang.

Man City hi tun hnaiah an khel ṭha leh tawh hle. October thla tira Liverpool nen Anfield-a 2-2 a an inhnehtawk hnu khan league match vawi nga khel leh tawhin an chak vek a, an hneh zingah hian an hmelma Manchester United pawh an tel.

Pep-a hote hian Europe-a match hnuhnung pahnihah nuam sa takin Club Brugge ṭum hnih an khel a, PSG hmachhawn turin an inpeih. Chutihrualin an thiampuipa Kevin de Bruyne chu Covid-19 a kai avangin a khel thei dawn lo a, hliam vangin Jack Grealish a dinhmun a chiang lo bawk.

PSG erawhin hming langsarah inhliam an nei lo a, tlarhmaah Lionel Messi, Neymar leh Kylian Mbappe te an inkawp thei dawn tihna a ni. MNM hminglem an pek, hming langsar pathumte hi Man City tlarhnung tan buaina tham a tling ang.

Chutihrualin Mbappe hi Real Madrid nen sawizawm a ni a, PSG-ah a nghet lo. Messi chuan, "Kylian chiahin a hma hun chu a sawi thei ang. Player pawimawh tak a nih avangin kan bula kum khat a awm hi ka lawm," tiin a kawppui player chungchang a sawi.

PSG ṭantute tana chanchin lawmawm a awm a, Man City hmachhawn tur squad-ah Sergio Ramos a tel a, Real Madrid aṭanga PSG zawmtu hian inhliam vangin a club thar tan a inlan lo a, bul a ṭan nghal erawh a rinawm loh.

French club hian player-ah buaina nei lo mah se manager Mauricio Pochettino erawh a rilru a fim kher lo ang. Argentine manager Poch hian Manchester United enkawl a hreh lo niin khawthlang media ten an ziak a, hlawhtling taka Real Madrid enkawltu Zinedine Zidane te chu PSG nen sawizawm a ni bawk.