Atletico tan chak ngei ngei a ngai!

Champions League last 16 lut tura Atletico Madrid-in an mamawh chu zanin dar 1:30-a AC Milan hneh a ni a, Italian club pawhin an beiseina chhi nung turin chak ngei ngei an mamawh.

Zaninah point thum hmuin European club lian pahnih an insu dawn tihna a ni a, a hmuhnawm loh ring suh - group B inkhel dangah zanin dar 1:30 hian Liverpool chuan FC Porto an mikhual dawn bawk.

Liverpool erawh match li an khelh tawhah an chak vek avangin hmahruaitu ni chungin last 16 an lut chiang tawh a, pahnihna Porto hian hnehna an chan a, Atletico an tlawm chuan Liverpool hnung an zui ang.

A tawi zawnga sawi chuan Atletico leh Milan tan beiseina chhi nung turin chak ngei ngei a ṭul a, Porto an tlawm erawh chuan Madrid khaw club hian an match tawp berah Portuguese club hi an la hmachhawn dawn avangin beiseina an la nei ve zel thei dawn.

Beiseina chauh
Liverpool laka 2-0 a an tlawm hnuin Atletico-in 3-3 in Valencia an inhnehtawkpui zui a, mahse, an match hnuhnung berah 1-0 a Osasuna hnehin a hunah tak an intuaithar.

AC Milan erawh Porto nen 1-1 a an inhnehtawk hnuah an insiamṭha rih lo. Milan derby-ah Inter Milan nen 1-1 in an inhnehtawk zui a, Pathianni khan Fiorentina lakah 4-3 in an tlawm bawk.

Tun hnai result aṭanga thlir chuan Atletico dinhmun a ṭha zawk a, Champions League-a la chak lo Milan hian an chak loh chuan an beiseina zawng zawng a tawp tawh dawn tih an hriat avangin thih thain an bei thung ang.

Diego Simeone-a naute hian an match tawp berah Porto an la hmachhawn dawn avangin an beiseina neih hi a la sang viau a, a pawimawh ber erawh an chak phawt a ni.

Madrid khaw club
Atletico forward Antoine Griezmann chu Liverpool nen an intawn hmasaka a red card avangin match hnih atan hrem a ni a, mahse, match khat a chawlh hnuah hrem a nihna chu UEFA-in match khatin an tihtawisak a, Milan a hmachhawn thei dawn.

Griezmann-a'n Atletico a kir hnuah a hun hmasa angin goal la khung pup pup rih lo mah se a khelh danah ngai a awh chho leh ṭan tawh tih a lang a, Champions League match thuma goal thum khung tawh striker hi ven bik a sual lo ang.

Luis Suarez-a'n league match tawp berah minute 25 chauh khel mah se Milan nena an inkhel tur ngaihtuah chungin Simeone-a'n a hahchawlhtir niin a lang a, Griezmann nen an inkawp chuan Milan tlarhnung tan hna a tam dawn.

Hetihlai hian chawn hliam vangin Joao Felix dinhmun a la sawi theih loh a, full back Kieran Trippier chu dar hliam vangin a khel thei lo chiang bawk.

Milan an ṭha?
Champions League-ah beisei phak lo mah se Serie A lamah Milan an kaltluang a, an match tawp berah Fiorentina an ngam lo chungin kha inkhel kha tun season-a league-a an tlawm hmasak ber a ni.

Milan tan kum 40 mi Ibra a la ṭha reng a, Swedish striker hian tun season-ah match kua khelin goal nga a khung tawh a, assist vawi hnih a nei - a kum aṭanga teh chi a ni lo.

Hetihlai hian an match tawp bera Fiorentina laka goal hnih khungtu striker hi coach Stefano Pioli-a'n hahchawlhtir a, Oliver Giroud luhtir zawk a thlang a nih pawhin a mak lo ang.

Milan hian hliam vangin Mike Maignan, Fikayo Tomori, Ante Rebic, Davide Calabria leh Samu Castillejo te an chhawr thei lo mek tih hriat erawh a ṭha.

Reds vs Porto
Liverpool-in last 16 an lut tawh miau a, coach Jurgen Klopp-a'n an ṭhat dan bera player a rem lo a nih pawhin dem theih a ni lo ang - hei tak hi Liverpool laka chak harsat Porto tan chuan chanchin lawmawm a ni dawn.

Porto hian Anfield-ah point thum an hlawh chuan an match tawp bera Milan an hmachhawn hunah tlang turin draw result chiah an mamawh tawh dawn a, Anfield-ah an hna harsa tur chinfel hmasak an duh ang.

Milan nena 1-1 a an inhnehtawk hnuah khan Porto hian inelna hrang hrangah match hnih an khel leh tawh a, goal riat khungin an lamah goal khat chiah a lut thung.

Hetihlai hian last 16 an luh chian tawh piahlamah, Inrinniah league khel tura Southampton an mikhual zui dawn avangin Klopp-a'n player naupang zawk khelhtir a tum nia sawi a ni a, zaninah Reds B team tia chhal theih kan hmu a nih pawhin mak ti suh.