Zverev-a'n a dinhmun sawhnghet

Mipa tennis thuneitu sang Association of Tennis Professionals (ATP) chuan ranking thar an ti chhuak a, world number 3 Alexander Zverev chuan pathumnaah a dinhmun a sawhnghet - season tharah pawh a sang zual pathum zinga tel chungin inelna a hmachhawn thei ang.

German tlangval Zverev hian ATP Finals khelh zawh takah khan Daniil Medvedev hnehin nomawi a chawi a, a thiam zual pariat inelnaah vawi hnih a champion tawh; ranking sang tak chunga kum tawp hman theih hi atan chuan duhthusam a ni ang.

Novak Djokovic chuan number 1 ni chungin kum tawp a hmang tlang dawn chiang. Serbian star hian number 1 ni chungin ṭum sarih hun a hmang dawn ta a, record nei ṭha ber Pete Sampras (vawi 6) nen an innihrualna chu a khum ta chiah.

Hliam vanga inkhel tam lo Rafael Nadal chu paruknaah a la awm. Spanish star hian January thla a khelh tur Australian Open inbuatsaih nan December-ah hian Dubai lamah inelna hmachhawn a tum, tun hnaiah match a khelh tam loh avangin ranking bakah fitness siam ṭhat a mamawh.

Grand Slam vawi 20 champion tawh Roger Federer chu 16-naah a awm. Swiss star hi a khup hliam vangin a la chawl mek, season tharah pawh a lo kir leh hun tur a la chian loh avangin a ranking hi a hniam zawngin a kal rih dawn.

Federer hi kum 40 a tling tawh a, tunah chuan tennis chawlhsan tumna a la nei rih lo. Mahse, hliam vanga a buai ngun tak avangin a ranking hi a hniam zawngin a kal zel a ngai, tournament a khelh leh meuh chuan seeded sang a ni phak dawn tawh lo tihna a ni.