Best FIFA Football Awards dawng thei tur tar chhuak

FIFA chuan anmahni hnuaia mimal chawimawina sang Best FIFA Football Awards dawng thei tur an tar chhuak a, mipa chawimawina dawng thei tur player 11 tarchhuah zingah Lionel Messi leh Cristiano Ronaldo te an tel a, defender pakhatmah an tel lo.

Coach ṭha pasarih thlanchhuah zingah Euro 2020 champion team enkawltu Roberto Mancini leh Copa America-a Argentina champion puitu Lionel Sebastián Scaloni te an tel bakah Champions League, Premier League, La Liga, Serie A leh Bundesliga champion puitu manager-te an tel bawk.

FIFA hian mipa leh hmeichhe pualin expert panel team hnih a din a, heng team-te hian nominee tur an thlang. Player ṭha ber leh coach ṭha ber bakah hian best goalkeeper dawng thei tur hming panga an thlang chhuak.

Goalkeeper-ah hian Premier League club-a khel pathum Alisson Becker, Edouard Mendy leh FA Cup-a Leicester City champion puitu Kasper Schmeichel te an tel a, Italy champion puitu Gianluigi Donnarumma hming a langsar a, Bayern Munich leh Germany captain Manuel Neuer a tel bawk.

Mipui tan FIFA.com lamah vote a thlak ṭan theih a, December 11, Inrinni zing dar 4:29 thleng vote a thlak theih. Nakkum January thla tirah chawimawina dawng thei tur category tinah hming pathum a tar chhuak ang a, Best FIFA Football Awards ceremony hi January 17, 2022-ah neih a ni ang.